Шукурҷон Зуҳуров, райиси МН, Сафири Озарбойҷон дар Тоҷикистон Аббосалӣ Каром оғлу Гасановро ба ҳузур пазируфт.
Тибқи иттилои дафтари матбуотии палатаи поёнии парлумони кишвар, дар ҷараёни мулоқот масъалаи тақвияти ҳамкориҳои дуҷониба дар ҳамаи заминаҳо, аз ҷумла муносиботи байнипарлумонӣ, ҳамкориҳои сиёсӣ, иқтисодӣ, энергетикӣ, кишоварзӣ, фарҳангӣ ва дигар мавзӯоти мавариди таваҷҷӯҳи тарафҳо муҳокима шуданд.
Зимнан, Зуҳуров дипломати озарбойҷониро ба муносибати Сафири фавқулодда ва мухтори Озарбойҷон дар Тоҷикистон таъин шуданаш муборакбод гуфта, ба вай ва ҳайати кормандони сафорати ин кишвар ҷиҳати иҷрои фаъолиятҳои минбаъдаашон дар мамлакати мо ва амалӣ намудани барномаҳои дуҷонибаи байни Тоҷикистону Озарбойҷон барори кору муваффақиятҳо орзу намуд. Номбурда ибрози умедворӣ намуд, ки бо таъин шудани Гасанов ба симмати сафир дар Тоҷикистон раванди муносиботи Душанбе ва Боку ба марҳилаи тоза ворид гардида, тамоюли рӯ ба рушдро касб мекунад.
- Ҷумҳуриҳои Тоҷикистону Озарбойҷон дорои як идда муштаркоти фарҳангиву таърихӣ ва мазҳабӣ мебошанд ва ин муштаракот метавонад заминаи мусоидро барои тақвияти ҳамкориҳои дигар соҳаҳо ба вуҷуд орад,- гуфт Шукурҷон Зуҳуров ва илова намуд, ки миллати тоҷику озарӣ аз қадим байни якдигар дар бахшҳои мухталиф ба таври инфиродиву дастаҷамъӣ ҳамкорӣ ва муносибати дӯстона доштанд ва хушбахтона, ин шеваи муносибат то имрӯз ҳифз гардида, сол аз сол густариш ёфта истодааст.
Дар навбати худ сафири Озарбойҷон изҳор дошт, ки моҳи оянда байни шаҳрҳои Душанбе ва Боку хатсайри ҳавоии Душанбе – Боку – Боку – Душанбе ифтитоҳ хоҳад ёфт, ки ин барои боз ҳам наздиктар шудани ду кишвар мусоидат мекунад.
Мӯҳр