Рӯзи гузашта, 27-уми июн дар пойтахт чорабиниҳои шаҳрдорӣ оид ба таҷлили 15 –солагии Рӯзи Ваҳдати миллӣ бо ширкати президенти Тоҷикистон ва райиси шаҳри Душанбе баргузор шуд.
Тибқи иттилои Шафқат Сайидов, сухангӯи мири шаҳр, зимнан дар ин чорабинӣ сабти асноди ҳолати шаҳрвандии 60 ҷуфт навхонадорон аз оилаҳои ниёзманди шаҳр дар кохи «Душанбе Плаза» сурат пазируфт.
Манбаъ афзуд, Эмомалӣ Раҳмон навхонадоронро нисбати дар Рӯзи Ваҳдати миллӣ бо ҳам бастани ақди никоҳ ва аз ҷониби шаҳрдорӣ баргузор намудани тӯйи арӯсию домодии онҳо сидқан табрик намуда, ба ҳар як ҷуфт дар расми тантанавӣ ангуштарҳои тиллоӣ, шаҳодатномаи ақди никоҳ ва 3000 сомонӣ тақдим намуда, акси хотиравӣ гирифт.
Маврид ба тазаккур аст, ки иқдоми мазкур дар асоси Қарори раиси шаҳри Душанбе № 280 аз 30 майи соли 2012 «Дар бораи дастгирии ташаббуси эҳсонкории субъектҳои соҳибкорию хоҷагидорӣ ҷиҳати баргузории тӯйи домодию арӯсии ҷавонон аз оилаҳои камбизоат дар шаҳри Душанбе» сурат гирифта, 11 субъектҳои хоҷагидорию соҳибкории шаҳр ҳар кадомӣ 41 ҳазор сомонӣ барои иҷрои ин амали хайр ба ифтихори Рӯзи Ваҳдати миллӣ дар маҷмӯъ 451 ҳазор сомонӣ хазина ташкил доданд. Аз ҳисобии маблағоти мазкур ба ҳар як ҷуфт либосҳои тӯйонаи шинам ва ангуштарҳои тиллоӣ бо гирифтани андозаи сару либос ва ангуштҳои домоду арӯс дар Туркия ҷиҳози тӯй омода карда шуда, сарфаи маблағҳо ба ҳар як ҷуфт 3000 сомонӣ тақдим гардид, ки ҷараёни хамаи корҳои омодагӣ зери назорати Комиссияи марбутаи доимии Маҷлиси вакилони халқи шаҳри Душанбе роҳандозӣ гашт.
Дар ҷараёни баргузории расми сабти асноди ҳолати шаҳрвандии 60 ҷуфт навхонадорон раиси шаҳри Душанбе М. Убайдуллоев зимни суханронӣ ва табрикоти хеш афзуд, ки баҳри таъмини иҷрои дастуру супоришҳои президент дар асоси Қарори шаҳрдорӣ аз 27 марти соли 2010 «Дар бораи дастгирии иҷтимоии оилаҳои камбизоати пойтахт» бо саҳмгузории субъектҳои соҳибкорӣ шурӯъ аз моҳи апрели соли 2010 дар шаҳр то ба имрӯз 1824 тӯйҳои хатнасур ва 104 тӯйҳои арӯсию домодӣ бо риояи Қонуни Ҷумҳурии Тоҷикистон “Дар бораи танзими анъана ва ҷашну маросимҳо дар Ҷумҳурии Тоҷикистон” доир карда шуданд.
Сипас, навхонадорон, ки онҳоро дар Боғи Дӯстии Халқҳо (н.Фирдавсӣ), Боғи Ирам (н. И. Сомонӣ), Кӯли ҷавонон (н. Сино) ва майдони 800-солагии Москва базми фарҳангии ноҳияҳо ва тахтҳои шоҳона интизорӣ мекашид, раҳсипор шуда, тӯлӣ якуним соат дар ин базмгоҳҳо ширкат варзиданд.
Мӯҳр