Аъзои «Tajiks community in South Korea» зиёд шуд

Теъдоди аъзоёни яке аз ҷамъиятҳо (диаспора)-и фаъол «Ҷамъияти тоҷикон дар Кореяи ҷанубӣ" (Tajiks community in South Korea)  ба 41 нафар расид, ки бештари онҳоро донишҷуёни тоҷики муқими ин кишвар ташкил медиҳад.

Тавре Абдулло Қодирӣ, сухангӯи Хадамоти муҳоҷирати Тоҷикистон ба Озодагон иттилоъ дод, донишҷӯёни тоҷик дар риштаҳои гуногуни хоҷагии халқ, ки имрӯз  Тоҷикистон ба ин гуна мутахассисон ниёз дорад, таҳсил мекунанд: «Донишҷӯёни тоҷик  дар риштаи муносибатҳои байналхалқӣ, (дипломатия) иқтисодиёти байналмилалӣ ва савдо, муҳандисӣ ва забономӯзӣ таҳсил менамоянд».
Бо ташаббуси Ҷон Бобоев, роҳбари «Ҷамъияти тоҷикон дар Кореяи ҷанубӣ» дар ҳар се-чор моҳ як маротиба дар шаҳрҳои гуногуни Кореяи ҷанубӣ вохӯрию мулоқот доир мегардад.
Манбаъ мегӯяд, дар мулоқотҳо, онҳо бо аъзоёни нав шинос шуда, оид ба мушкилот ва проблемаҳое, ки дар тӯли таҳсил, фаъолият ва буду бошашон дар ин кишвар пайдо мешавад, дар якҷоягӣ ҳаллу фасл менамоянд.Ҷамъияти мазкур саҳифаҳои интернетии худро дар сомонаи www.facebook.com  ва «Мой Мир» доро мебошад.   
-Бо таваҷҷӯҳ ба  ин, чанде қабл Сафиалло Девонаев, сардори Хадамоти муҳоҷирати Тоҷикистон бо Ён Ҷонку, кафили сафорати Корея дар Тоҷикистон мулоқот намуд ва дар бораи нақшаҳои густариши муҳоҷирати кории шаҳрвандони Тоҷикистон ба кишварҳои хориҷӣ сӯҳбат кард. Девонаев ба дипломати Корея изҳор дошт, ки пешнависи қарордоди байниҳукуматии Тоҷикистон ва Кореяи Ҷанубӣ дар бораи муҳоҷирати корӣ ва ҳифзи иҷтимоии муҳоҷирони корӣ таҳия ва миёни вазоратхона ва муассисаҳои зидахли ду кишвар ба тавофуқ расидааст,-афзуд манбаъ.





Мӯҳр