Ду тан аз сокинони 20 солаи шаҳри Кӯлоб як корманди милисаро лату кӯб намуда, ӯро бо корд захмӣ карданд.
Ба гуфтаи Идимад Одинаев, муфаттиши калони прокуратураи шаҳр, зӯҳри рӯзи 11-уми июл дар маркази савдои Гулҷаҳон, Ғолибҷон Азимови 20-сола, сокини маҳаллаи Шоҳин бо Мустафо Холиқов, корманди шӯъбаи корҳои дохилии шаҳр дар муноқиша даромада, баъдан Ғолибҷон корманди милисаро зери лату кӯб мегирад. Дар ин ҳангом шарики ӯ, Умед Исмоилов, сокини кӯчаи ба номи Куйбишев, бо таҳқиру ҳақорат ба милиса дарафтода, ду захми кордӣ ба шонаи чапи Холиқов мезанад. Пас аз захмдор кардани милиса онҳо аз маркази савдо бадар рафта, барои гурехтан аз ҷои ҳодиса, ғайриқонунӣ як нақлиёти дар сари роҳ мондашударо дуздида, фирор мекунанд.
Оид ба ин ҳодиса аввал дар ШКД нисбати ҳар ду бо моддаи 252, қисми 3 (ғайриқонунӣ ронда, бурдани автомобил бидуни мақсади тасарруфӣ) парвандаи ҷиноятӣ боз шуда, ба прокуратураи шаҳрӣ интиқол дода мешавад. Баъдан, аз болои эшон дар прокуратура тибқи моддаи 237, қисми 3 (авбошӣ) парвандаи ҷиноятӣ оғоз гашта, тафтишоти пешакӣ идома меёбад.
Бино ба иттилои Идибек Одинаев, дар ҳоли ҳозир як гумонбаршуда боздошт гаштаву дар маҳбас будааст. Нафари дуввум, Умед Исмоилов ҳанӯз дар ҷустуҷӯ қарор дорад.
Тибқи хабари ғайрирасмӣ ин дуввумин ҳолат дар 6-моҳи имсол мавриди лату кӯб қарор ёфтани кормандони милиса дар шаҳри Кӯлоб будааст. Аммо дар прокуратура дар мавриди ҳолати аввала хабар надоштаанд. «Инчунин ҳолат дар прокуратура ба қайд гирифта нашудааст ва низ парвандаи чиноятӣ ба роҳ монда нашудааст», гуфт муовини прокурори шаҳр Озар Исоев.
Мӯҳр