Аз сафорати ҶТ ба назди бадахшониҳои шаҳри Маскав касе набаромад

Бадахшониҳои муқими Маскав ҳудуди 150-200 нафар дар назди бинои сафорати Тоҷикистон даст ба тазоҳурот заданд.

Тавре хабарнигори масковии “Озодагон” аз ҷойи ҳодиса иттилоъ медиҳад, мардум алайҳи вуруди неруҳои низомии ҳукумати марказӣ ба хоки вилоят дар пайи куштори генерал Абдулло Назаров тазоҳур карданд. Тазоҳургарон аз мақомот талаб доранд фавран таҳоҷум болои Хоруғро қатъ намоянд.Аз он ки ин таҷаммӯъ бидуни иҷоза сурат гирифтааст, пулиси Маскав зуд барои пароканда кардни он ҳозир шуда, бо эҳтиром аз ҳозирин тақозои тарки назди бинои сафоратро кард.

Хабарнигори Озодагон илова кард, ки аммо касе аз масъулини сафорат бо мардум гуфтугӯ накард. Ҳамчунин навбатдори сафорат худро муаррифӣ кардан нахост ва аз ташреҳи ин қазия худдорӣ намуда, хоҳиши дертар занг заданро кард ва гӯширо осемасар партофт.

Тазоҳургарон бо ин вуҷуд, ки оромона талаботи пулисро итоат карданд, тасмим гирифтанд, ки бо иҷозаи расмӣ дар фурсати наздиктарин тазоҳуроти тозаеро роҳандозӣ хоҳанд кард.

Яке аз ширкаткунандагони ин таҷаммӯъ ки худро Шоҳқадам муаррифӣ кард, ба хабарнигори “Озодагон” гуфт, мо аллакай як бор заҳри чунин гунаҳкоркуниро чашидем. Дар ҷанги гражданӣ ҳама помириҳоро гунаҳкор мекунанд, ки барои мо ҳамин бас аст. Мо намехоҳем, ки бори дигар моро гунаҳкор кунанд. Ин кори худи марказ аст, мехоҳад моро боз сиёҳ кунад. Ин правокатсия аст”.

Тазоҳуроти орому осоишта бошад ба оҳистагӣ пароканда шуд.

 

Мӯҳр