Сироҷиддин Валиев, раиси иттифоқи «Тоҷикматлубот» мегӯяд, мо қудрат дорем тайи моҳи шарифи Рамазон нархи гӯштро дар шаҳри Душанбе дар сатҳи 28 сомонӣ нигоҳ дорем, аммо шароит надорем.
Номбурда аз камбуди ҷойи тиҷоратӣ (савдо) дар Душанбе шикоят кард: «Мо дар Душанбе мавқеи тиҷоратӣ надорем. Ҳар сол дар бозори Шоҳмансур як мавқеъ доштем, ки савдо мекардем. Имсол моро намонданд. Як идораи нави ташкили савдо кардаанд. Хай, доранд худшон донанд. Ҳаминро нигоҳ накарда, мо дар дохили бозори Шоҳмансур дар моҳи Рамазон фурӯши гӯшти говро бо нархи 28 сомонӣ ва гӯшти бузу гӯсфандро бо нархи 30 сомонӣ ташкил мекунем».
Раиси иттифоқи «Тоҷикматлубот» мегӯяд бо ин мақсад ба ғайр аз бақияе, ки доранд аз Данғара боз 229 сар чорвои калон 271 сар чорвои хурд харидорӣ намудаанд.
Ин кӯшишҳои масъулин барои поён бурдани нархҳо дар ҳоле аст, ки хароҷоти тавлидкунандагон ҳам дар паи афзоиши нархи сӯзишворӣ техника ва ғайра зиёд гардидаст. Аз ҷумла чорводорон мегӯянд баҳори имсол нархи як дарза кох то 25 сомонӣ расида буд.
Дар ҳамин шароит, аз нигоҳи иқтисодӣ афзоиши нархи гӯшт ногузир арзёбӣ мегардад. Сироҷиддин Валиев, раиси «Тоҷикматлубот», ки ваъдаи то 28 сомонӣ расондани нархи гӯштро дод, изҳор медорад, ки аз хароҷоти истеҳсолкунандагон бохабар аст: «Мо дар ноҳияҳо нуқтаҳои қабули маҳсулоти хоҷагии қишлоқро ташкил кардем, ки аз дасти аввал аз истеҳсолкунанда харида мефурӯшанд».
Раиси «Тоҷикматлубот» яке аз далелҳои нисбатан қиммат будани нархҳо дар бозорҳои кишварро, шумораи зиёди миёнаравҳо гуфт: «Масалан гӯшт баъзан аз дасти чорум ё панҷум ба дасти харидор мерасад. Мо бевосита аз чорводор гирифта дар бозор мефурӯшем».
Мӯҳр