Интиқоли захмиён ба Душанбе. Оташбас дар Хоруғ

Интиқоли захмиён ба Душанбе ба маротиб афзоиш ёфта, амалиёти мусаллаҳона дар шаҳри Хоруғ идома дорад.

Як низомии баландпоя аз мақомоти амниятии кишвар аснои сӯҳбат бо Озодагон дар беморхонаи ҷумҳуриявии ба номи Дяков гуфт:  «Шаби гузашта шумораи захмиён, ки дар амалиёти низомӣ дар шаҳри Хоруғ тир хӯрдаанд, ба маротиб афзуд. Интиқоли захмиён аз Хоруғ ба Душанбе аз нимаи рӯзи гузашта шуруъ шуда то субҳи имрӯз ба 35 нафар расидааст. Шаби гузашта ду нафар, ки ниҳоят ҷароҳати вазнин гирифта буданд, ба ҳалокат расиданд. Айни ҳол се нафари дигар дар ҳолати вазнин қарор доранд, ки ба як нафараш танҳо нафаси сунъӣ дода метавонанду халос.»
Ҳамчунин ин манбаъ илова намуд,  ки амалиёт алайҳи Толиб Айёмбеков ва гурӯҳи ӯ аввалҳои субҳи 24-уми июл дар маркази шаҳри Хоруғ сурат гирифта, ба муқовимати шадид оварда расонид».
Сарчашмаи хабар афзуд, ки аз эҳтимол дур нест, ки имрӯз низ аз мақомоти ҳифзи ҳуқуқ ва сохторҳои қудратии Тоҷикистон қувваҳои иловагӣ алайҳи Толиб Айёмбеков ва гурӯҳи ӯ ба шаҳри Хоруғ тариқи чархбол интиқол дода шавад.
Дар ҳамин ҳол, расонаҳои хориҷӣ ба такя ба манбаҳои худ иттилоъ медиҳанд, ки то соати 14-00-и имрӯз оташбас эълон шуда, ҷонибҳо кушташудагон ва захмиёнро хоҳанд шумурд.




Мӯҳр