Русский  >>  فارسی  >>  Сешанбе 6 декабр 2016, 13:09

Малакаи рӯзноманигорон дар таҳияи маводи касбӣ оид ба сил такмил меёбад

22 август 2012, 10:54

23-24-уми августи соли равон дар меҳмонхонаи «Меркурий» давраи омӯзишии амалӣ барои рӯзноманигорон таҳти унвони «Инъикоси масоили пешгирию назорати бемории сил ва шаклҳои гуногуни он дар ВАО» баргузор мешавад.

Тавре ба хабаргузории «Озодагон» ҳамоҳангсоз оид ба сафарбаркунии иҷтимоии Лоиҳаи ҲОУП дар Тоҷикистон Сурайё Одинаева иттилоъ дод, мақсади баргузории тренинг ба рӯзноманигорон омӯзонидани инъикоси касбии масоили шаклҳои мутобиқгаштаи сил дар ВАО мебошад. Зимнан такмили малакаи журналистон дар таҳияи маводи чопию онлайнӣ, радиоӣ ва телевизионӣ оид ба ин мавзӯъ ва баррасии ҷанбаҳои ҳуқуқию ахлоқии бозтоби он дар ВАО, инчунин густариши ҳамкории рӯзноманигорон бо Вазорати тандурустии Тоҷикистон, Маркази ҷумҳуриявии мубориза бар зидди бемории сил ва созмонҳои байнулмилалие, ки дар ин бахш кор мекунанд, барномарезӣ шудааст: «Ҳамзамон иштирокдорон ва коршиносони давраи омӯзишӣ роҷеъ ба ҷанбаҳои тиббии шаклҳои мутобиқгаштаи сил ва роҳҳои муолиҷаи он, пешгирии паҳншавии бемории сил дар маҳбасҳои Тоҷикистон ва миёни муҳоҷирони меҳнатию кӯдакон, зарурати таъмини соҳаи тандурустии кишвар бо мутахассисони силшинос ва дигар масоили мубрам табодули назар мекунанд. Ба ҷуз ин, рӯзноманигорон бо табобатгирандагон ва шифоёфтагони шакли мутобиқгаштаи сил мусоҳиба меороянд», - иброз дошт Одинаева.
Тренерони ин чорабинии омӯзишию амалӣ сарвари Мактаби мустақили рӯзноманигории «Тоҷикистон - асри XXI» Сафо Сафаров ва сардори Маркази матбуоти Вазорати тандурустӣ Фотима Ғоибова мебошанд.
Манбаъ мегӯяд, дар рӯзи дуввуми тренинг баргузории нишасти хабарӣ бо иштироки Соҳибназар Раҳмонов, муовини вазири тандурустӣ, Тимур Аптекар, менеҷери Барномаи зиддисилии Лоиҳаи ҲОУП дар Тоҷикистон, Октам Бобохоҷаев,сарвари Маркази ҷумҳуриявии мубориза бар зидди бемории сил, Саидаҳтам Рустамов, сардухтури беморхонаи ҷумҳуриявии клиникии бемориҳои сили «Шифо» ва дигар масъулини мақомоти давлатию созмонҳои байнулмилалӣ пешбинӣ гардидааст.
Дар ҷамъбаст иштирокдорони давраи омӯзишии амалӣ дар заминаи иттилооти аснои тренинг ва нишасти хабарӣ гирдовардаашон матолиби чопию онлайнӣ, радиоӣ ва телевизионӣ таҳия карда, мавриди баррасӣ қарор медиҳанд. Ҷиҳати омодасозии маводи ҳирфаӣ онҳо бо дастгоҳҳои навор-, садо- ва аксбардорӣ, компютеру ноутбук, барномаҳои касбии танзим ва Интернети бесим таъмин мегарданд.
Тренинги мазкур аз ҷониби Вазорати тандурустӣ ва Мактаби мустақили рӯзноманигории «Тоҷикистон - асри XXI» бо дастгирии Лоиҳаи ҲОУП ва Хазинаи Глобалӣ оид ба мубориза бар зидди ВНМО/БПНМ, сил ва табларза созмон дода мешавад.


Шарҳи худро бинависед:

Ном:*
E-Mail:
Матни шарҳ:

Матолиби ҳамсон:


Дар бораи мо

"Озодагон" нахустин хабаргузории хусусии тоҷикист, ки дар бархе аз кишварҳои Шӯравии пешин ва хориҷ аз он сабти ном шуда, мақоми минтақаиро касб кардааст. Хабаргузорӣ дар ҳоли ҳозир бо забонҳои тоҷикӣ, русӣ ва ҳуруфи форсӣ хабар нашр мекунад.

Нишонӣ: Душанбе, кӯчаи Мирзо Турсунзода-45; ҳуҷраи 408

Телефон: (+992) 50 20 777 88; (44) 600 10 60; (37) 881 07 09

E-mail: ozodagonweb@gmail.com


Разработка и дизайн сайта: «SmartMedia»

Ҳафтанома

Cаҳифаҳои вижа

Мо дар Фейсбук!