Масъулини Хадамоти зиддиинҳисории Тоҷикистон яке аз сабабҳои болоравии нархи ордро дар кишвар пойбандии бозори орд ба хориҷа ва номунтазамии воридоти онро ном мебаранд.
Тибқи иттилои Хадамот, дар моҳҳои июн-июл воридоти орду гандум ба кишвар, аз ҷумла шаҳри Душанбе нисбатан кам шудаст. Тайи ин ду моҳ воридоти орд ба пойтахт 38,3 фоиз ва гандум 7,9 фоиз кам гардидаст.
Дар натиҷа, талабот аз пешниҳод бештар шуда, мувозинати талаботу пешниҳод вайрон гардидаст, ки ин дар навбати худ барои афзоиши нархҳо мусоидат кардаст. Дар қатори сабабҳои дигари афзоиши нархи орд масъулини Хадамот афзоиши нархи гандумро дар бозори ҷаҳонӣ меноманд, ки дар натиҷаи коҳиши ҳаҷми интизории ғалладонагиҳо дар кишварҳои истеҳсолкунанда- Қазоқистон, Русия, ИМА ва дигарҳо ба вуҷуд омадаст.
Дар маҷмӯъ, тайи 7 моҳи аввали соли ҷорӣ ба кишвар 210,2 ҳазор тонна орд ва 395,7 ҳазор тонна гандум ворид гардидаст. Талаботи солонаи Тоҷикистон ба орд ҳудуди 1,7 миллион тонна гандум, ё 1,1 миллион тонна орд арзёбӣ мешавад.
Мӯҳр