Русский  >>  فارسی  >>  Сешанбе 6 декабр 2016, 15:08

Дар Душанбе Кумитаи тадорукот оид ба ислоҳоти қонуни интихоботи президентӣ таъсис ёфт

22 сентябр 2012, 08:38

Мизи мудаввари Консорсиюми юридикии Тоҷикистон имрӯз, 22-юми сентябр сурат пазируфт. Дар он намояндагони ҳизбҳои сиёсӣ, ҳуқуқшиносон ва созмонҳои байналмилалӣ ширкат доштанд.

Пешниҳоди ислоҳот ва тағийру иловаҳо ба қонуни интихоботи президентӣ аз муҳимтарин ҳадафи ҳамоиш арзёбӣ гардид. Раҳматилло Зойиров, роҳбари Консорсиюми юридикии Тоҷикистон аз мушкилӣ ва қонуншиканиҳо дар интихоботҳои қаблӣ мисол оварда, таъкид кард, ки дар сурати ба эътибор гирифта нашудани пешниҳодоти навбатӣ, интихоботи қарибулвуқӯи раёсатҷумҳурӣ низ ношаффоф баргузор хоҳад шуд.

Иштирокдорони мизи муддавар Кумитаи тадорукот оид ба ислоҳоти қонуни интихоботи президентиро таъсис доданд. Маҳмадалӣ Ҳайит, муовини роҳбари ҲНИТ, Раҳматилло Зойиров, раҳбари ҲУСДТ, Бузургмеҳр Ёров, аъзои коллегияи «Сипар», Амният Абдулназаров, роҳбари ҷамъияти «Демофони демография», Хайрулло Абдуллоев, муовини роҳбари ҲДТ, Шералӣ Кенҷаев, Зариф Ғуломов ва Ҳикматулло Сайфуллозода ба ҳайати кумитаи мазкур шомил гардиданд.

Гурӯҳи мазкур дар натиҷаи баҳсҳои зиёд лоиҳаеро қабул намуд, ки дар он 6 пешниҳод барои ворид кардани тағйиру илова ба бандҳои қонуни президентӣ зикр шудааст.
Нишасти навбатии Кумитаи тадорукот дар нимаи дуввуми рӯзи 25-уми сентябр баргузор хоҳад шуд. Дар натиҷаи ин нишаст лоиҳа такмил ёфта, кумитаи тадорукот тасмим дорад, онро ба Конфронси Ҳуқуқи башар, ки дар шаҳри Варшава доир мешавад, бифиристад.

Ёдовар мешавем, мизи мудаввари Консорсиюми юридикии Тоҷикистон, ки «Зарурати ворид намудани тағйироту иловаҳо ба Қонуни конститутсионии ҶТ «Дар бораи интихоботи Президенти ҶТ» унвон дошт, мебоист ҳанӯз 13-уми сентябри соли равон дар Маркази «Иттилоот ва муошират», воқеъ дар бинои Маркази таҳқиқоти стратегии Тоҷикистон баргузор мегашт, аммо баъдан созмондиҳандагон гуфтанд, ки масъулини марказ иҷозаи баргузории онро надодаанд. Ба қавли Зоиров меҳмонхонаи «Каён», Иттифоқи нависандаҳо, Академияи илмҳо низ розӣ нашудаанд, ки ҳамоишро мизбонӣ кунанд.



Шарҳи худро бинависед:

Ном:*
E-Mail:
Матни шарҳ:

Матолиби ҳамсон:


Дар бораи мо

"Озодагон" нахустин хабаргузории хусусии тоҷикист, ки дар бархе аз кишварҳои Шӯравии пешин ва хориҷ аз он сабти ном шуда, мақоми минтақаиро касб кардааст. Хабаргузорӣ дар ҳоли ҳозир бо забонҳои тоҷикӣ, русӣ ва ҳуруфи форсӣ хабар нашр мекунад.

Нишонӣ: Душанбе, кӯчаи Мирзо Турсунзода-45; ҳуҷраи 408

Телефон: (+992) 50 20 777 88; (44) 600 10 60; (37) 881 07 09

E-mail: ozodagonweb@gmail.com


Разработка и дизайн сайта: «SmartMedia»

Ҳафтанома

Cаҳифаҳои вижа

Мо дар Фейсбук!