Дар пайи як амалиёти кормандони АНМН чунин миқдор маводи мухаддира кашфу мусодира гардид.
Тавре Бобоҷон Шафиев, масъули дафтари матбуотии Агентии назорат аз болои маводи нашъаовар ба Озодагон иттилоъ дод, дар қаламрави ноҳияи Қумсангири вилояти Хатлон баъди пайгирии чандрӯза ба гумони қочоқи маводи мухаддир автомашинаи тамғаи «Опел-астра», ки аз ҷониби шаҳрванди 52-солаи Тоҷикистон идора мешуд, боздошт ва мавриди тафтиш қарор гирифт.
Аснои азназаргузаронии мошин аз он 122 бастаи дар шакли китоб пресскардашуда, ки ҳар кадом дорои маводи қаҳваранг бо бӯи махсус буданд, берун оварда шуд.
Тибқи хулосаи лабораторияи ташхиси судии Агентӣ маводи мусодирашда ҳашиш буда, вазни умумии он 85 килоро ташкил медиҳад. Ҳар бастаи селофанӣ дорои мӯҳр ва бо хати арабӣ аломатгузорӣ шудааст, ки нишондиҳандаи сифати баланди нашъа мебошад.
Тафтишоти аввалия нишон дод, ки ин миқдор мавод аз Афғонистон бо истифода аз роҳҳои пинҳонӣ ба Тоҷикистон оварда шуда буд ва қочоқчиён қасд доштанд, дар наздиктарин фурсат онро ба кишварҳои ИДМ интиқол диҳанд.
Аз рӯи ин ҳодиса тибқи моддаи 200, қисми 4 (муомилоти ғайриқонунии воситаҳои нашъаовар ва ё моддаҳои психотропӣ бо мақсади фурӯш дар ҳаҷми ниҳоят калон) КҶ-и Ҷумҳурии Тоҷикистон парвандаи ҷиноятӣ оғоз карда шудааст.
Мӯҳр