Ширкати ҳавопаймоии «Тоҷик Эйр» бинобар коҳиш ёфтани қурби риёли эронӣ парвозҳо ба ин кишвари исломиро ба таъхир гузошт.
Парвози навбатӣ мебоист 13-уми октябр анҷом мешуд, аммо масъулини «Тоҷик Эйр» мегӯянд, он ба вақти номаълум ба таъхир гузошта шудааст. «Фурудгоҳи Теҳрон барои пардохти сузишворӣ асъори хориҷӣ талаб кардааст. Вақте маводи сӯхтро бо асъори хориҷӣ харидорӣ намоем, чӣ гуна чиптаҳоро бо пули миллӣ фурӯшем? Айни ҳол иваз кардани риёл ба доллар ғайриимкон аст»,- гуфтанд дар «Тоҷик Эйр».
«Тоҷик Эйр» аввалин ширкати ҳавонавардӣ нест, ки бо далели коҳиши қурби пули миллии Эрон парвозҳо ба ин кишварро қатъ кардааст. Қаблан, ширкати «AirAsia»-и Малайзия ва «BMI»-и Бритониё ҳам чунин тасмим гирифтанд.
Айни замон дар Эрон барои 1 доллар 37,5 риёл пешниҳод мекунанд. Қурби расмии доллар ба 28,5 ҳазор риёл баробар аст.
Сабаби бохти риёл ҷорӣ намудани таҳримҳои иқтисодии Иттиҳоди Аврупо ва ИМА арзёбӣ мешавад.
Мӯҳр