Кормандони сохтори ҳифзи ҳуқуқ дар ноҳияи Панҷ зимни амалиёти вижае миқдори зиёди маводи мухаддирро мусодира кардаанд.
Тавре ба Озодагон аз ВКД иттилоъ доданд, дар ҷараёни гузаронидани амалиёти фаврӣ дар ҳудуди деҳаи Селгаи роҳи мошингарди Панҷ-Қумсангир автомашинаи тамғаи «Фолсваген-Пасат»-ро, ки аз ҷониби Авроралӣ Шакурови 35 сола, сокини деҳаи Буркаи ноҳияи Панҷ идора мешуд, боздоштанд.
Ҳангоми азназаргузаронии автомашинаи мазкур аз дохили борхалтаи мусофири он Раҳмоналӣ Қосимови 29 сола, сокини деҳаи Селга, маводи нашаъадори навъи «ҳашиш» вазнаш 7 килою 80 грамм дарёфт ва мусодира карда шуд.
Манбаъ инчунин афзуд, ки дар пайи амалиёти мазкур аз ҷониби кормандони ҳуқуқ муайян карда шуд, ки Раҳмоналӣ Қосимов маводи мазкурро аз Толибҷон Раҳимови 30 сола, сокини ҳамон ҷо, барои фурӯш гирифтааст.
Феълан нисбати ин ҳодиса парвандаи ҷиноӣ оғоз гардида, тафтиш давом дорад.
Мӯҳр