Дар шаҳри Кўлоб муаррифии лоиҳаи бузургтарин осоишгоҳи табобатӣ дар вилояти Хатлон баргузор шуд.
Бино ба иттилоъи хабарнигори маҳалии Озодагон, ин тафреҳгоҳ бо маблағи 15 миллион сомонӣ аз ҷониби ҶММ «Зарҳам» дар ҳудуди хоҷагии ба номи Ҳамадонӣ бунёд ёфта, ҳадафи аслии он таъмини саломатии мардум мебошад. Он дар майдони беш аз 18 гектар бунёд шуда, дар як вақт 150 нафар дар ин ҷо ба табобату истироҳат фаро гирифта мешавад. Дар осоишгоҳ ба ғайр аз утоқҳои муолиҷавӣ, инчунин майдони футбол, корти теннис, ҳавзи шиноварӣ, марказҳои маърифатӣ, маданиву маишӣ аз ҷумлаи китобхона, толори баргузории чорабиниҳои фарҳангӣ бунёд хоҳанд шуд.
Ҳамчунин, барои истироҳати мизоҷон дар осоишгоҳ нишастгоҳҳои алоҳида ва ҷои тафреҳу сӯҳбат миёни сабзазор бо диду намуди нав сохта мешаванд. Набиҷон Зардиев, роҳбари ҶДММ «Зарҳам» гуфт: «Хизмати ходимони осоишгоҳ танҳо барои мизоҷони алоҳида нест, балки кулли сокинони шаҳру аҳолии Кӯлоб метавонанд, аз хизмати доимии тиббӣ дар ин ҷо бархўрдор бошанд».
Шаҳрдори Кӯлоб Абдуғаффор Раҳмонов зимни муаррифии барнома, ки масъулини он низ ширкат доштанд, гуфт: «Мо аз чунин як лоиҳа, ки барои таъмини тандурустӣ ва истироҳати мардум пешбинӣ мешавад, истиқбол дорем ва аз ҷониби худ кӯмакамонро дареғ намедорем».
Мӯҳр