Шаффофият барои рушд. Дар Тоҷикистон

Дар Душанбе семинар оид ба ташаббуси шаффофияти соҳаҳои истихроҷкунанда доир мегардад.

Дар ин бора ба Озодагон аз намояндагии Институти «Ҷамъияти Кушода» - Бунёди Мадад дар Тоҷикистон иттилоъ доданд. Ин чорабинӣ бо ҳамшарикии гурӯҳи Бонки ҷаҳонӣ, Ҷамъияти олмонии ҳамкории байналмилалӣ (GIZ)  ва Вазорати молияи ҶТ барои намояндаҳои сохторҳои давлатӣ, ширкатҳои соҳаи истихроҷкунанда ва созмонҳои ҷомеаи шаҳрвандӣ сурат мепазирад. Ҳадаф аз семинар дурнамои амалӣ намудани ТШСИ (ташаббуси шаффофияти соҳаҳои истихроҷкунанда) дар Тоҷикистон ва баррасии таҷрибаи
Озарбойҷон, Қазоқистон, Қирғизистон ва Муғулистон оид ба пешбурди Ташаббуси шаффофияти соҳаҳои истихроҷкунанда мебошад.

Гуфта мешавад, Ҷумҳурии Тоҷикистон раванди ҳамроҳшавиро ба ТШСИ моҳи июни соли 2011 шурӯъ кардааст. Моҳи августи ҳамон сол 21 созмони ҷомеаи шаҳрвандӣ  ҷонибдориашонро аз ТШСИ изҳор намуданд ва Иттиҳоди «Шаффофият барои рушд»-ро таъсис доданд. Барои омода кардани воридшавӣ ба ташаббуси мазкур бо супориши ҳукумат аз ҳисоби намояндагони вазорату идораҳо, ширкату созмонҳои ҷамъиятӣ гурӯҳи корӣ таъсис дода шуд. 31 августи соли 2012 Ҳукумати Тоҷикистон лоиҳаи қарори ҳамроҳшавии кишварро ба ТШСИ  қабул кард.

Ҳамроҳшавии Тоҷикистон ба ТШСИ таъсири мусбат дошта, обрӯи мамлакатро чун як кишвари шаффофи соҳаи истихроҷкунанда баланд мебардорад ва вазъи сармоягузориро ба ҷумҳурӣ беҳ мегардонад. Ба ғайри ин, Тоҷикистон чун як кишвари ҷонибдори ТШСИ қонунгузориашро такмил медиҳад, дараҷаи шаффофияти даромадҳоро ба буҷаи давлатӣ ва харҷи дурусти онҳоро боло мебарад, вуруди сармояи хориҷиро афзун мекунад ва бо ин теъдоди ҷойҳои нави корӣ, сарчашмаи нави даромади табақаҳои муайяни аҳолӣ ба вуҷуд меоянд.

Мӯҳр