«Китоби сол-2012». Боз як озмуни ВФ

Вазорати фарҳанги Тоҷикистон Озмуни ҷумҳуриявии «Китоби сол-2012»- ро аз 20 ноябри то 20 декабри соли равон эълон менамояд.

Тавре аз хадамоти матбуотии ин вазорат ба Озодагон иттилоъ доданд, мақсад аз баргузории озмуни мазкур дарёфти беҳтарин асарҳои бадеии муосири тоҷик аст, ки ҷавобгӯи меъёрҳои санъати сухан ва забони адабӣ мебошад. Мазмуну  мӯҳтавои асарҳои мазкур бояд мавзӯъҳои худшиносии миллӣ, арҷгузорӣ ба рукнҳои давлатдорӣ, таҳкими сулҳу субот ва амнияти кишварро дар бар гирифта, ба завқи алоқамандони каломи бадеъ созгор афтад; дар дили хонанда оташи меҳру муҳаббат ва садоқат ба
Ватан, обу хоки кишварро барафрӯзанд; ҳамчунин бо ороишоти хуб муқовабандӣ шуда бошанд.

Гуфта мешавад, дар озмун ҳамаи муаллифони асарҳои назму насри тоҷик, ки китобҳояшон тайи соли 2012 дар муассисаҳои нашриявииТоҷикистон нашр шудаанд, ҳуқуқи иштирок кардан доранд. Маҳорати маъниофарӣ, риояи санъати сухан, бадеият, забон, услуб, пайвастагии афкор ва банду басти силсилаи воқеаҳо, мувофиқати мазмуну мундариҷаи асар бо талаботи замони муосир шартҳои асосии озмун маҳсуб меёбанд.

Барои ғолибон дипломҳо ва мукофотҳои зерини Вазорати фарҳанги Тоҷикистон аз ҷумла барои ду китоби назм: Дипломи дараҷаи аввал ва 1500 сомонӣ ва Дипломи дараҷаи дуввум ва 1000 сомонӣ, барои ду китоби наср: Дипломи дараҷаи аввал ва 1500 сомонӣ ва дипломи дараҷаи дуввум ва 1000 сомонӣ пешбини карда шудааст.

Мӯҳр