Бан Ки Мун, дабири кулли СММ имрӯз дар Қоҳира (пойтахти Миср) бо президенти он кишвар Муҳаммад Мурсӣ мулоқот мекунад.
Тибқи иттилоъ ва гузоришҳои расида, Миср аз ҷумлаи кишварҳоест, ки дар раъси ҷонибдорони хатми хушунат дар Ховари Миёна қарор дорад. Расонаҳои хориҷӣ дар ҳамин ҳол мегӯянд, тайи шаш рӯзи даргирӣ миёни Фаластину Исроил беш аз 100 фаластинӣ ва 3 исроилӣ ба ҳалокат расидааст.Президенти Амрико низ дирӯз дар сӯҳбат бо Мурсӣ, раҳбари давлати Миср гуфтааст, зарур аст ҳар чӣ зудтар мушакборон аз сӯи Ҳамос хотима ёбад .
Ҳамзамон, дар Брюссел, пойтахти Белгия, вазирони умури хориҷии Иттиҳоди Аврупо ҷонибҳоро ба оташбас даъват карда, хостори хатми мушакборон аз навори Ғаза шуданд ва ҳам аз Исроил даъват кардаанд, то “мутаносиб амал карда, дар ҳамлаҳои ҷавобиаш ҳамеша ҳифзи мардуми мулкиро замонат диҳад.”
Бенямин Нетаняҳу, нахуствазири Исроил шартҳои кишвараш барои оташбасро эълон кардааст, ки аз ҷумла қатъи мушакборон аз ҷониби Ҳамос ва талоши байналмилалӣ барои тазмини инро, ки Ҳамос дигарбора мусаллаҳ нахоҳад шуд, дар бар мегирад.
Дар ҳамин ҳол, роҳбари давлати худгардони Фаластин ва сарвари Ҳамос Холид Машъал дирӯз дар Қоҳира гуфт, низоъро бояд аввал Исроил бас кунад: “Музокироти мо бо раҳбарону мақомоти иктишофии Миср идома дорад. Мо ҳар рӯз мулоқот дорем, вале ман дар бораи ҷараёнаш сӯҳбат намекунам. Мо шартҳои Тел-Авивро қабул нахоҳем кард. Исроил аст, ки таҷовузро ба хоки Фаластин шурӯъ кард».
Мӯҳр