Кӯлоб: Ҷоми СССР-2012 ғолибро интизор аст

Имрӯз дар варзишгоҳи марказии шаҳри Кӯлоб мусобиқаи умумиҷумҳуриявӣ оид ба футбол байни наврасони то синни 16-сола барои гирифтани Ҷоми СССР-2012  ифтитоҳ ёфт.

Дар маросими кушодашавии он, Нуралӣ Хоркашов, масъули федератсияи футболи ҶТ, Сайёфи Мизроб, сардабири ҳафтаномаи СССР ва намояндагони Кумитаи сайёҳӣ ва варзиши вилояти Хатлона шаҳри Кӯлоб иштирок доштанд. Бояд гуфт, ин ҷоиза 4 сол муқаддам бо ибтикори нашрияи СССР ва федератсияи футболи ҷумҳурӣ ташкил ёфта, дар он футболбозони навраси то сини 16-сола аз ҳамаи шаҳру навоҳӣ ҳуқуқи ширкат кардаро доранд. Воқеан, барои нахустин маротиба аст дар кишвар, ки миёни наврасон бозии професионалии футбол гузаронида мешавад. Дар нахустин сабқат мактаби олии ҷумҳуриявии маҳорати варзишии шаҳри Душанбе ғолиб омада, соле баъд футболбозони Вахш соҳиби медалҳои хурди тиллоии Ҷоми СССР гаштанд, соли гузашта бошад, тими «Равшан»-и Кӯлоб ғолиби мусобиқа шуд.

Бино ба қавли хабарнигори Озодагон, дар мусобиқаи имсола шаш даста аз шаҳрҳои Душанбеву Норак ва Кӯлоб, инчунин дастаҳои навоҳии минтақаи Кӯлоб ширкат менамоянд.Ба мусобиқа футболбозони суғдӣ ҳам даъват гашта буданд, аммо  бо сабабҳои номаълум иштирок надоранд. Сайёфи Мизроб, масъули баргузории мусобиқот буҷаи баргузории Ҷоми СССР-2012  95-ҳазор сомонӣ арзёбӣ карда, иброз дошт, ки ин маблағ барои тӯҳфаҳои хотиравӣ, ҳаққи истиқомат дар меҳмонхона, хӯрокворӣ ва нақлиёт масраф мешавад.   

Айни замон дастаҳои «Равшан»-и Кӯлоб  ва «Барқ»-и Норак бо ҳам қувваозмоӣ доранд. Баъди даври якуми бозӣ, ҳисоб 2:0 ба фоидаи наврасони кӯлобӣ аст.




Мӯҳр