Баррасии Стандарти ягонаи давлатии хизматрасонӣ ба андозсупорандагон

Дар Кохи Ваҳдати шаҳри Душанбе муаррифии Стандарти ягонаи давлатии хизматрасонӣ ба андозсупорандагон ва мониторинги сифати хизматрасонӣ ба андозсупорандагон, ки аз якуми январи соли 2013 мавриди амал қарор дода мешаванд, баргузор гардид.

Аз Кумитаи андози Тоҷикистон ба Озодагон хабар доданд, ки дар ин чорабинӣ намояндагиҳои Бонки ҷаҳонӣ, Бонки Осиёгии Рушд, Корпоратсияи молиявии байналхалқӣ, намояндагии Иттиҳоди Авруппо дар Тоҷикистон ва дигар намояндагиҳои ташкилотҳои байналхалқӣ, инчунин масъулини вазорату идораҳои дахлдор ширкат намуданд.
Масъулини Кумитаи андоз дар ин нишаст зикр намудаанд, ки Стандарти ягонаи давлатии хизматрасонӣ  бо мақсади баланд бардоштани сифати хизматрасонӣ ва дар сатҳи замонавӣ ба роҳ мондани ҳамкорӣ дар муносибатҳои андозӣ бо андозсупорандагон таҳия шудааст.

Гуфта мешавад, баробари такмил ёфтани сохтори мақомоти андоз ва қабули Кодекси андози Тоҷикистон дар таҳрири нав Стандарти ягонаи давлатии хизматрасонӣ ба андозсупорандагон низ такмил дода шуда, дар таҳрири нав қабул гардид.

Манбаъ мегӯяд, дар санади мазкур ба таври дақиқ расмиёти хизматрасонӣ муайян гардида, ҳамзамон барои назорати таъмини иҷрои пурраи он мунтазам мониторинги сифати хизматрасонӣ бо истифода аз ҷорӣ намудани пурсишномаҳо ва анкетаҳо, ки бевосита аз ҷониби андозсупорандагон тартиб дода мешаванд, гузаронида хоҳад шуд: « Пурсишномаҳо дар сомонаи расмии Кумитаи андоз ҷойгир карда шудааст ва дилхоҳ андозсупоранда метавонад бо истифода аз он сатҳу сифати хизматрасонии мақомоти андоз ва корманди мақомоти андозро баҳогузорӣ намояд, дархосту эродҳои худро дар он дарҷ созад. Баҳогузории хизматрасонии мақомоти андоз имкон медиҳад, ки камбудиҳои ҷойдошта дар фаъолияти соҳа муайян гардида, баҳри ислоҳи онҳо сари вақт чораҷӯӣ карда шавад. Ҳамзамон шаклҳои қоғазии анкетаҳо ва пурсишномаҳо дар утоқҳои хизматрасонии мақомоти андоз ҷойгир карда мешаванд, ки дастраси андозсупорандагон мебошад».

Дар ин ҳамоиш иштирокчиён  ҷиҳати боз ҳам беҳтар ба роҳ мондани сатҳи хизматрасонӣ ба андозсупорандагон ва мукаммал намудани стандартҳои хизматрасонӣ таклифу пешниҳодоти  худро иброз доштаанд.

Бино ба иттилои манбаъ, мақомоти андоз нақша дорад, ки минбаъд мунтазам дар миёни андозсупорандагон ва кормандони соҳа корҳои тавзеҳотиву фаҳмондадиҳиро оид ба татбиқи амалии Стандарти ягонаи давлатии хизматрасонӣ ба андозсупорандагон боз ҳам тақвият бахшад.
Мӯҳр