Ҷудо гардидани беш аз 10 миллион сомонӣ барои бахши обрасонии Зафаробод

Барои барқароркунии иншоотҳои обрасонӣ дар ноҳияи Зафарободи вилояти  Суғд аз буҷаи давлат ин миқдор маблағ ҷудо карда шуд.

Тавре аз раёсати мелиоратсия ва хоҷагии оби вилоят ба Озодагон хабар доданд, маблағи мазкур барои харидорӣ намудании  муҳаррики барқӣ ба маблағи  6,5 миллион сомонӣ ва маблағи боқимонда барои  дастрас намудани маводҳои  изолятсионӣ барои таъмири  муҳаррикҳои барқии пойгоҳҳои обкашӣ, харидории таҷҳизотҳо барои барқарорсозии чоҳҳои амудӣ, тоза намудани заҳбуру заҳканҳо ба масофаи 30 км пешбинӣ гардидааст.

Ҳамзамон, Қоҳир Расулзода, райиси вилояти Суғд ба таври ҳамешагӣ ба вазъи фаъолияти пойгоҳҳои обкашии «Мирзочӯл-1», «Мирзочӯл-2»  «Мирзочӯл -3», « Қизилӣ», ДВГНС, ки дар рушду тараққиёти хоҷагии ноҳияи Зафаробод  нақши муассир доранд, таваҷҷӯҳ зоҳир менамояд.  

Маврид ба ёдоварист, пойгоҳҳои обкашии Мирзочӯли тоҷикон ҳанӯз солҳои 60-уми асри гузашта бунёд ёфтаанд. Аз ҷумла, пойгоҳи обкашии «Мирзочӯл-2» соли 1963 бунёд ёфта, тариқи он 24 ҳазор гектар заминҳои кишти ноҳия обёрӣ мегарданд. Ин иншооти бузурги гидротехникӣ дорои 4 муҳаррики бузург буда, обро ба баландии 95 метр ва ба дарозии беш аз 900 метр интиқол медиҳад. Дар ин пойгоҳи обкашӣ беш аз 200 нафар коргарону мутахассисон меҳнати дилгармона доранд.
Мӯҳр