Сӯхтори ахир дар бозори “Корвон” роҳбариятро такон дод, ки маркази матбуотӣ таъсис диҳад.
Тавре аз маъмурияти бозори мазкур ба Озодагон иттилоъ доданд, бо қарори роҳбарияти фурӯшгоҳ, Баҳром Мараимов ба ҳайси сарвари дафтари матбуотии бозори “Корвон” таъин шуда, аз ин пас иртиботи ҷомеъа ва доираҳои хабарнигориро бо бозор ба роҳ хоҳад монд.
Ҳамзамон, оқои Мараимов мегӯяд, ҳадаф аз таъсиси маркази матбуотӣ - мавриди таваҷҷўҳи хабарнигорон ва мардум қарор доштани бозори калонтарини Тоҷикистон мебошад: “Таъсиси маркази матбуотӣ барои посухи сареҳ ва комил додан ба суолҳо аст. Минбаъд маркази мазкур барои равшанӣ андохтан ба фаъолияти бозори мазкур бо ҷомеаи журналистӣ ҳамкорӣ намуда, иттилои заруриро дастраси онҳо мегардонад".
Инчунин, барои огоҳонидани харидорон ва тоҷирони бозор аз хабарҳои нав дар бораи ҳаёти рӯзмарраи бозори “Корвон”, қарор аст, радиои маҳаллии бозор низ фаъол гардад”.
Бозори “Корвон” миёни ҳамаи бозорҳои Душанбе калонтарин ба ҳисоб рафта, бештари тоҷирон маводу маҳсулоти худро аз он харидорӣ менамоянд.
Маврид ба ёдоварист, рӯзи 5-уми сентябри соли равон, бар асари оташсӯзӣ дар қисмати яклухтфурӯшии бозори “Корвон”, ҳудуди 8 ҳазор метри мураббаъи бозор ва 2.250 дӯкону нуқтаи савдо нобуд шуд. Дар ин ҳодиса як нафар ҳалок ва чор каси дигар захм бардошта буданд. Пас аз як рӯзи оташсузии бозори “Корвон” сару садоҳои зиёд миёни мардум паҳн гардид ва савдогарони бозор барои додхоҳӣ ба кӯчаҳои Душанбе рехтанд.
Мӯҳр