Баррасии муҳоҷирати меҳнатӣ миёни Тоҷикистону Канада

Саидғуфрон Абдулло, муовини сардори Хадамоти муҳоҷирати Тоҷикистон бо Питер Кулен, мушовир оид ба масъалаҳои мудирият ва консулӣ, консули Сафорати Канада дар Тоҷикистон мулоқот намуд.

Тавре аз Хадамоти муҳоҷирати Тоҷикистон ба Озодагон иттилоъ доданд, муовини сардори хадамот ташрифи меҳмононро ба Хадамоти муҳоҷират хайрамақдам гуфта, доир ба таъсиси ин хадамот, самтҳои асосии фаъолияти он  ёддовар шуд. Номбурда қайд кардааст, ки то имрӯз 4 созишнома ба Федератсияи Русия, Қазоқистион, Қирғизистон ва Беларус ба имзо расид ва бо 3 кишвар созишномаҳо тасдиқ (ратификатсия) шудаанд.

Гуфта мешавад, Хадамоти муҳоҷират ба нақша гирифтааст, ки бо Украина, Кореяи Ҷанубӣ ва Қатар низ созишномаҳоро ба имзо расонад.

Дар ин мулоқт қайд гардидааст, ки муҳоҷирати меҳнатӣ равандест, ки аксари кишварҳои олам бо ин падида рӯ ба рӯ мебошанд ва тибқи маълумотҳои Созмони байналмилалии муҳоҷират(СБМ) дар соли 2010 дар ҷаҳон теъдоди муҳоҷирони меҳнатӣ 214 миллион нафарро ташкил дода, бо пешбиниҳое, ки коршиносон ва мутахассисони соҳаи муҳоҷират анҷом додаанд то соли 2050 ба 405 миллион нафар мерасад.

Бино ба иттилои манбаъ,  7 нафар шаҳрвандони кишвари Канада дар Тоҷикистон  иҷозати кор дарёфт намуда, 188 нафари дигар ба қайд гирифта шудаанд.

Масъулини хадамоти мазкур мегӯянд, дар маҷмӯъ имрӯз 195 нафар шаҳрвандони Канада дар Тоҷикистон кору фаъолият менамоянд.

Дар ҷараёни ин ҳамоиш Питер Кулен аз пазироии роҳбарияти хадамот ва меҳмоннавозии мардуми тоҷик изҳори ташаккур намуда, доир ба мушкилот ва праблемаҳои шаҳрвандони Канада дар Тоҷикистон ибрози андеша намуд.

Ў доир ба масоили гирифтани иҷозати кор, тамдиди раводиди шаҳрвандони ин кишвар ва бархе аз праблемаҳое, ки дар ин замина ба вуҷуд меоянд, аз намояндагони Хадамоти муҳоҷират пурсон шуд.

Дар ҳамин ҳол Саидғуфрон Абдулло доир ба саволҳои Консули Сафорати Канада посухҳои мушаххас дода, пешниҳод намуд, ки ба таври пилотӣ дар яке аз минтақаҳои тобеи марказ, марказҳои омӯзиши забонҳои хориҷӣ ташкил карда шавад.

Ин пешниҳод аз ҷониби Питер Кулен ба инобат гирифта шуд ва  ҷонибҳо ризоияти худро баҳри тақвияти ҳамкориҳо ва мулоқотҳои навбатӣ ҷиҳати соддагардонии рафту омади муҳоҷирони  меҳнатӣ-шаҳрвандони ду кишвар  баён доштанд.
Мӯҳр