Дар ин бора Рафиқчон Шокиров, муовини аввали сардори Хадамоти алоқаи назди Ҳукумати ҷумҳурии Тоҷикистон имрӯз, 30-юми январ дар ҳузури хабарнигорон зимни нишасти матбуотии созмонёфта иброз дошт.
Ба гуфти оқои Шокиров, маҳдуд шудани дастрасӣ ба шабакаи иҷтимоии Фейсбук ва бархе аз сомонаҳои интернетӣ ҳеч рабте ба “рӯйхати сиёҳ”-и сайтҳо надорад:
“Муваққатан маҳдуд намудани дастрасӣ ба сомонаҳо дар Тоҷикистон пас аз муроҷиати «доброволетс»-ҳо сурат гирифт. Ҳамаи ин тибқи талаботи қонун ва Кодекси граждании Тоҷикистон дар бораи шаъну шараф ва тӯҳмату таҳқир ҷараён гирифт”
Номбурда ба шарҳи вожаи «доброволетс»-ҳо пардохта афзуд, ки онҳо мисли ҳамаи мову шумо шаҳрвандони оддии Тоҷикистон мебошанд, ба мо занг мезананд ва оиди шаъну шараф ва матолиби таҳқиромез изҳори назар мекунанд. Шокиров ҳамчунин гуфт, ки хадамоти алоқа ба ҳеч як провайдери интернетӣ паёмак дар мавриди бастани сомонаҳо ирсол накардааст.
Ин дар ҳолест, тайи ду се моҳи ахир дар Тоҷикистон чандин дафъа дастрасӣ ба интернет ва шабакаҳои иҷтимоӣ масдуд шуда буд. Асомуддин Атоев , раиси Академияи иттилоот ва коммуникатсияи Тоҷикистон дар сӯҳбат бо Озодагон гуфта буд, ки тибқи таҷрибаҳо дар Тоҷикистон барои баста шудани сомонаҳо аввал паёмак мерасад ва баъдан мактуби расмӣ, аммо Хадамот мувофиқи хоҳиши худ ба баъзе ширкатҳо зудтару ба дигараш дертар чунин паёмак ва баъдан мактуб мефиристад .
Мӯҳр