3 ҳикмати галстукҳои «таранг»
Тоҷикистон ангор ба маризии сироятии шиму костюм ва галстукпӯшӣ гирифтор шудан дорад. Ба назар мерасад, ки яке аз талаботҳои асосӣ барои ба кор қабул кардан дар бархе идораҳои давлатӣ маҳз ҳамин костюмдориву галстукбандӣ аст. Ҳар қадар галстукат таранг баста бошад, ҳамон қадар таваҷҷӯҳ ба корҷӯ зиёдтар мешавад. Аммо албатта инҳо низ №2 ҳастанд. Пеш аз ин бояд корҷӯ "тағо" ё ҳадди аққал пул дошта бошад. Маблағу тағоро яксӯ гузорему баргардем сари галстуку шиму костюм. Нахуст аз ҳикмати галстукдӯстдории мақомот бигӯем. Шояд онҳо фикр мекунанд, афроди галстукдор ҳамагӣ нобиға ҳастанд.
Ҳар қадар шиму костюм гаронарзиш ва галстук яллақосӣ бошад, соҳибаш ҳамон андоза босавод ва устои кори худ аст. Дар телевизиони давлатӣ бидуни галстук ба эфир баромадани журналист корест маҳол. Ҳатто ҳамсӯҳбатҳоро низ маҷбур мекунанд, ки галстук бипӯшад, аммо дар ин миён таваҷҷӯҳ намекунанд, ки оё мавзӯи сӯҳбат алоқамандие ба он дорад ё не. Масалан, мантиқан вобаста ба маҳалле, ки сабт сурат мегирад ва бо дарназардошти фаъолияти касбии қаҳрамон шарт нест, ҳамсӯҳбат ҳатман шиму костюм ва галстук дошта бошад. Як нафар аз хатмкардаи факултаи журналистикаи ДМТ, ки чанд муддат корманди шабакаи аввали телевизион буд, гуфт сужаи таҳиякардааш танҳо ба ин хотир намоиш дода нашуд, ки ӯ галстук надошт. Гап сари ин аст, ки барномаи вай оид ба корҳои сохтмонӣ дар биноҳои баландошёнаи Душанбе будааст ва ҳам замоне ки сужа омода мешуд, зимистони қаҳратун буд. Дар мавриди миёни гулу гулзор ва даруни боғи сердолударахте қаҳрамони барнома- овозхони сину солаш ҷое расидаро бо шиму костюму галстуги тарангбаста на якбору ду бор гуфтаанд.
Акнун баргардем ба паҳлӯи дигари мавзӯъ. Аз макотиби миёна сар карда, то омӯзишгоҳҳову донишгоҳҳои олӣ ва вазорати маориф ба галстук таваҷҷӯҳи хосе доранд. Яъне, ҳама бояд галстук дошта бошад. Гӯйё галстукпӯшӣ нишонаи маърифати баланд аст. Муаллими №1 Абдуҷаббор Раҳмонов чаро ба галстук ин қадар дилбастагӣ дорад маълум нест, аммо ба дунбол ҳамаи муассисаҳои олии таълимӣ зертобеонашонро маҷбур ба галстукбандӣ мекунанд.
Ёдатон бошад, чанд сол қабл вақте гап-гапи галстуки ҳатмӣ баланд шуд, ҳама аз сагчаи галстукпӯш мегуфтанд. Қисса чунин аст, ки ректори собиқи донишгоҳи омӯзгорӣ амре содир кард, ки дарбонҳо ҳеч донишҷӯи бидуни галстукро аз дарвозаи донишгоҳ ворид шудан намегузоштанд. Баъди чанд муддати ин амр як субҳ дар саҳни донишгоҳ сагчаеро дидаанд, ки дар гарданаш галстук дорад. Баъдан маълум шуд, ки як гурӯҳ донишҷӯён бо ин шева ба амри раиси донишгоҳ писханд задаанд. Бегалстукӣ барои чандин донишҷӯ хатари аз донишгоҳ ихроҷ шуданро ба миён овард. Галстукпушӣ бошад, чандин нафарро баъди хатми таҳсил соҳиби ҷои кор дар донишгоҳ намуд. Ҳоло маълум нест, ки бо маҷбуран пӯшондани шиму костюм ва бандондани галстук бо таҳдидҳои аз донишгоҳ рондану ғайраву ҳоказо то куҷо муваффақ мешаванд. Аммо нафареро медонам, ки дар донишгоҳ ҳар қадар маҷбураш мекарданд, галстук намепӯшид, аммо баъди хатм шиму костюмпӯш шуд. Медонед, чаро? Таъсири филмҳои туркӣ. ӯ, ки як замон аз ҳаводорони филмҳои туркӣ буд, мегӯяд қариб 90 дар сади қаҳрамонҳои ин филмҳо костюму шим ва галстук доранд. Тасаввур намоед, дар панҷ сол муаллимон бо зӯру таҳдид ӯро галстукпӯш карда натавонистанд, аммо тамошои филмҳои туркӣ бидуни кадом дастуре шиму костюмпӯшаш кард. Пас вазорати маорифро ҳам мебояд ҷои маҷбур кардан аз роҳҳое истифода намоянд, ки муассир бошад…
Ахиран, мушоҳида мешавад, ки дар Тоҷикистон раванди шиму костюмпушӣ ва галстукбандӣ "мӯд" мешавад. Ба қавле баъзеҳо ончунон ба галстук дилбастагӣ доранд, ки гӯйё "гармашон" карда бошанд. Ин тоифа шиму костюм ва галстукро ба сифати "корти сабз" истифода мебаранд. Барои мисол на ҳамаи нозирони роҳ ронандаҳои галстукдорро нигоҳ медоранд. Духтарон бошанд ба писарони галстукдор гӯё таваҷҷӯҳ доранд ва ғайра.
| « Апрел 2024 » | ||||||
|---|---|---|---|---|---|---|
| Душ | Сеш | Чор | Пан | Ҷум | Шан | Якш |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | |||||
