Аз марги Карзайи хурдӣ то инфиҷори Қандаҳор

Пас аз чанд лаҳзаи анҷоми маросими дафни бародари райисҷумҳур Ҳомид Карзай- Аҳмад Валӣ Карзай дар шаҳри Қандаҳори Афғонистон ду инфиҷори шадид ба вуқӯъ пайваст. То ин лаҳза дар мавриди сабабҳои таркиш ва қурбониёни он маълумоте нарасидааст. 




Хабаргузориҳо навиштаанд, маросими видоъ бо Аҳмад Валӣ  бо ҳузури як қатор мансабдорони сатҳи баланди ҳукумати давлати исломӣ бо шумули райисҷумҳур Ҳомид Карзай сурат пазируфт. Ба иттилои сомонаи newsru.com таркишҳо ҳамагӣ  чанд лаҳза баъд аз маросими дафн ба вуқӯъ пайвастанд. Бархе аз соҳибназарон ҳадс мезананд, ки ҳадаф аз ин инфиҷорҳо шояд аз миён бурдани президенти давлати исломӣ аст.    
Ҷанозаи бародари райисҷумҳури Афғонистон, ки мебоист баъди зӯҳри рӯзи гузашта анҷом мешуд, ба субҳи 13-уми июл гузошта шуд. Ин тасмим ба он хотир гирифта шуд, то Ҳомид Карзай низ дар он ширкат варзад. Ҳамчунин гуфта мешавад, ки як сабаби дигари дертар анҷом шудани маросими дафн ташхиси судӣ-криминалии ҷасад будааст.  
Рӯзномаи «The Daily Telegraph»-и чопи Бритониё навиштааст, ки аз субҳи барвақт ҳудуди ҳазор нафар дар рӯ ба рӯи бинои қароргоҳи волӣ ҷамъ шуданд, то намози ҷанозаи бародари президентро гузоранд. Ҷасади Аҳмад Валӣ Карзайро дар зодгоҳаш, рустои  Карзи вулусволии Қандаҳор  ба хок супурдаанд.

Ҳифзи амният зимни маросими дафн дар Қандаҳор бар ӯҳдаи пулис буд. Ҳаракати нақлиёт дар тамоми кӯчаҳо қатъ гардида, танҳо пиёдагардон ҳаққи убури кӯчаи марказии шаҳрро доштанд.  Гуфта мешавад, дар фазои шаҳр низ чархболҳо ҷиҳати ҷилавгирӣ аз ҳар гуна амали номатлуб дар парвоз буданд. Аммо тавре баъдтар маълум шуд, ин ҳама натавонист аз амали терорристӣ пешгирӣ намояд.  
То ин лаҳза нафаре ё гурӯҳе масъулияти анҷоми ин таркишҳоро бар дӯш нагирифтааст.  Эҳтимолан, амали мазкур кори дасти Толибон бошад, мегӯянд соҳибназарон.  Мақомоти расмӣ бошанд, алъон дар ин маврид изҳори назар накардаанд.
Маврид ба тазаккур аст, Аҳмад Валӣ Карзай, ки 49 сол дошт, дар манзили зисташ дар шаҳри Қандаҳор кушта шуд. Гуфта мешавад, ӯро сардори хадамоти амниятияш беҷон гардондааст. Хабаргузориҳо навиштанд, ки Сардор Муҳаммад баъди сӯиқасд ба ҷони бародари президент худро низ ба ҳалокат расонидааст.  

«Хабари ҳузнангези ҳалокати фоҷиавии бародари азизи шумо Аҳмад Валӣ Карзайро бар асари сўиқасди террористӣ бо андӯҳи бузург дарёфтам. Дар ин лаҳзаҳои ҳассос омодагии комили ҷумҳурии Тоҷикистонро ҷиҳати тақвияти воқеии ҳамкории ду давлат дар мубориза алайҳи нерўҳои аҳримании терроризми байналмилалӣ ва дигар хатару чолишҳои ҷадиди минтақа ва ҷаҳони муосир бори дигар  таъкид менамоям. Ҳамдардии амиқи худ ва тамоми мардуми Тоҷикистонро ба шумо ва аъзои оилаи  бародари марҳуматон изҳор намуда, аз даргоҳи Худованди мутаъол сабри ҷамил хоҳонам. Худо ҷояшро ҷаннат ва маъвои охираташро пурнур гардонад. Инно лиллоҳи ва инно илайҳи роҷиун».

Аҳмад Валӣ Карзай, ки раҳбарии шӯрои вилояти Қандаҳорро бар ӯҳда дошт, яке аз шахсиятҳои воломақом дар ҷануби Афғонистон маҳсуб мешуд. Гуфта мешавад, бародари президент «душманон»-и зиёде дошт. Ҳатто аз миёни артиши миллии Афғонистон афроде, ки ӯро хуш надошт, кам набуданд. Ашхоси воломақоми низомӣ чандин маротиба Аҳмад Валиро дар ғайриқонунӣ аз худ кардани замини давлат, бо шумули заминҳое, ки ба афсарони вазорати дифоъ таалуқ дошт, муттаҳам мекарданд. Ҳамчунин, дар мавриди даст доштани бародари Ҳомид Карзай дар қочоқи маводи мухаддир сару садоҳои зиёде бархоста буд.
Дар гузашта ҳам ба ҷони Аҳмад Валӣ чандин маротиба сӯиқасдҳои номуваффақ анҷом шуд. Масъулияти сӯиқасди бародари хурдии Ҳомид Карзайро гурӯҳи Толибон бар ӯҳда гирифтаанд. Ин ҳодисаро онҳо «дастоварди бузург» унвон карданд.
Акнун суоли боз пешорӯи ҷомеаи кунунии Афғонистони ҷангзада ин аст, ки ин дафъа сӯиқасд ба ҷони кӣ сурат мегирад? Пурсишест, албатта бе посух. Агар ҷавоб ҳам пайдо кунад, нокомил аст, зеро ин кишвар ноором асту сулҳи саросарӣ ҳам барои сокинонаш орзуе беш нест…

{jathumbnail off} Мӯҳр