Русский  >>  فارسی  >>  Шанбе 10 декабр 2016, 02:14

Партовгоҳи «Севастопол»: Чӣ бояд кард?

19 январ 2012, 05:22

Мутаасифона, масъулини ҳукумати ноҳияи Сино роҳи ҳалли як мушкилие, ки солҳост бархе аз истиқоматкунандагонро ба ташвиш овардааст, наёфта, то ҳол чораҷӯйӣ мекунанд.

Бархе аз сокинон шаҳраки «Севастопол»-и ноҳияи Синои пойтахт ба мушкилоти ҷиддӣ рӯ ба рӯ шудаанд, аммо масъулини ҳукумат то имрӯз чорае наандешидаанд.   
Холаи Муҳаббат, яке аз истиқоматкунандагони бинои Раҳмон Набиев 10, ки роҳбарии бинои мазкурро ба ӯҳда дорад ва дорои маълумоти тиббӣ аст, дар наздикии хонаҳояшон ҷойгир кардани партовгоҳро хатар ба ҷони худу фарзандонашон дониста ба бемории марговар дучор шудани писарчаи 12 соларо далел бар гуфтаҳои худ медонад. Ин бону мегӯяд, дар чунин мавзеъ ҷой додани партовгоҳ барои шумораи зиёди истиқоматкунандагон зараровар аст: «Соли гузашта як писари ҳамсояаамон ба бемории шадиде гирифтор шуд, вақте ӯро ба беморхона бурданд, мутаасифона табибон бемории кӯдакро муайян карда натавонистанд. Танҳо ҳамин қадар гуфтаанд, ки шояд ба организми кӯдак ягон микроб таъсир расонда бошад, аммо ба дарди ӯ саривақт дармон бахшида натавонистанд. Бо заҳмат ва харҷи маблағҳои зиёд  кӯдакро аз дами марг раҳониданд».  
Холаи Муҳаббат изҳор дошт, ки то имрӯз сабр карда, барои кӯчонидани партовгоҳ аз назди хонаҳоямон ба шахсони масъули раддаи поёни ҳукумат муроҷиат намудем, вале эшон шикояти моро нодида гирифта чорае наандешиданд. Тасмим гирифтем, ки бо ариза ба райиси ноҳия муроҷиат мекунем ва ҳамин тавр ҳам кардем. Интизор доштем, ки масъулини боломақом барои ҳалли ин мушкилӣ чорае меандешанд, мутаасифона онҳо низ то ҳол ягон чора надиданд. Аз тарси он ки буйи партовгоҳ ба хонаҳоямон надорояд тобистону зимистон дару тирезаҳоямон пӯшидааст. Мо ба масъулин расонидем, ки агар барои пурра кӯчонидани партовгоҳ имконият набошад, аққалан қисме аз қуттиҳо ба ҷойи дигар кӯчонида шавад. Ба гуфтаи ин бону, як маротиба қисме аз қуттиҳоро ба ҷойи дигар кӯчониданд, вале пас аз чанд муддат боз гардонда ба ҷойи аввалааш меоранд ва то ҳол дар ҳамин ҷо боқӣ мондаанд.

Бачаҳо ҳам дар хатаранд

Хайринисо Шарипова, мудири кӯдакистони №62-и шӯъбаи маорифи ноҳия низ ба андешаи истиқоматкунандагони бинои наздик ба партовгоҳ мувофиқ буда, пешниҳоди онҳоро ҷонибдорӣ менамояд. Ӯ мегӯяд, воқеан ҳам ин партовгоҳ дар ҷойи номувофиқ ҷойгир карда шудааст. Пеш аз ҳама барои мо бисёр нигаронкунанда аст, ки партовгоҳ дар наздикии ошхонаи боғчаи «Афсона» қарор дорад, дар ҳоле  ки дар ин боғча 100 нафар кӯдакони аз сини 2 то 6-сола таълиму тарбия мегиранд, ба назари ман аз нигоҳи санитариву экологӣ бисёр хатаровар аст. Мудири боғча номувофиқ будани ҷойи партовгоҳро қабл аз ҳама дар наздик буданаш ба даромадгоҳ ва ошхонаи кӯдакистон дониста изҳор дошт, ки хуб мешуд агар миқдори қутиҳои партовпартоӣ камтар карда мешуд ва як қисми онҳо ба ҷойи дигар кӯчонида  мешуд.  
Хуршед Саидов  сардори коперативи моликони № 16-и ноҳияи Сино дар чунин мавзеъ ҷойгир намудани партовгоҳро вобаста ба шароити набудани ҷойи дигар мувофиқ дониста шикояти сокинонро беасос арзёбӣ намуд. Ӯ дар ин вазифа таҷрибаи якунимсола дорад. Номбурда мегӯяд, дар шаҳраки «Севастопол» ҳамагӣ 3 нуқтаи партовпартоӣ мавҷуд аст, ки дар яке 8 қуттӣ дар дигараш 16 ва дар ин партовгоҳ 21 қуттӣ ҷойгир карда шудааст. Аз соли 2005 ин ҷониб ин партовгоҳ дар ҳамин мавзеъ ҷойгир аст ва то соли 2010 касе шикоят накарда буд, вале аз ҳамин сол сар карда онҳое, ки дар бинои наздикии партовгоҳ ба сар мебаранд изҳори норозигӣ мекунанд, ки партовгоҳ аз ин ҷо ба ҷойи дигар кӯчонида шавад. Мутаасифона, мо ин шароитро надорем, имконияти қуттиҳоро ба ҷойи дигар кӯчонидан ҳам надорем, зеро ҷойи мувофиқ ёфт намешавад, афзуд Хуршед Саидов. Ӯ мегӯяд, моҳи июни соли 2011 аз номи истиқоматкунандагони бинои Раҳмон Набиев 10  ба ҳукумати ноҳия аризаи шикояти пешниҳод намудааст. Ба қавли ӯ, масъулин қавл додаанд, ки барои ҳалли ин мушкилӣ чора мебинанд вале то ҳол ба аризаи пешниҳоднамудаи эшон ҷавоб нагуфтаанду хомӯширо ихтиёр намудаанд.

Ҳама норозӣ!

Дар ҳамин ҳол, Шералӣ Ганҷалов муовини якуми райиси ноҳия, ки танзими корҳои манзилию коммуналиро ба ӯҳда дорад мегӯяд, мо аз мушкилии сокинони ин маҳал огоҳ ҳастем, соли дуюм аст, ки онҳо барои кӯчонидани партовгоҳ аз назди хонаҳояшон шикоят мебаранд . Барои ҳалли ин мушкилӣ чораҷӯӣ ҳам намудем, аз чунин аҳвол бохабар шуда, аз онҷо дидан намуда, як маротиба қисме аз қуттиҳоро ба ҷойи дигар кӯчонидем, вале сокинони дигар низ нахостанд, ки партовгоҳ дар назди хонаҳояшон бошад, ба тарафи шимолу ғарбии боғча кӯчонидем, вале роҳбарияти кӯдакистон низ изҳори норозигӣ намуданд , ноилоҷ монда, ба ҷойи авалаашон баргардондем.
Муовини райиси ноҳия дарвоқеъ зиёд будани қуттиҳоро дар ин партовгоҳ ва мушкилоти сокинони маҳаллаи мазкурро тасдиқ намуда иброз менамояд, ягона роҳи ҳалли ин мушкил  дар он аст, ки мо бояд партовгоҳро ба ду қисм тақсим намоем. Ин намояндаи ҳукумат номусоид будани сардии ҳаворо иллати кашол ёфтани ҳалли ин мушкилӣ дониста мегӯяд, мо ба аҳолии ин маҳалла маслиҳат додем, ки то фасли баҳор бо ҳам мувофиқа кунанд ва барои кӯчонидани қисме аз қуттиҳо ҷойи муайянро интихоб намоянд, то ин ки мушкилоти ҷойдошта ҳалли худро биёбад.

Чора нест…

Ин дар ҳолест, ки аризаи шикоятии истиқоматкунандагони бинои Раҳмон Набиев 10 дар гармтарин фасли сол -моҳи инюни соли 2011 ба ҳукумати ноҳияи Сино расидааст. Мутаасифона, масъулини ҳукумати ноҳияи Сино то ҳол роҳи ҳалли як мушкилие, ки солҳост бархе аз истиқоматкунандагони шаҳраки «Севастопол»-ро ба ташвиш овардааст, наёфта то ҳол чораҷӯйӣ мекунанд.

Ибодуллоҳи Тоир



Шарҳи худро бинависед:

Ном:*
E-Mail:
Матни шарҳ:

Матолиби ҳамсон:


Дар бораи мо

"Озодагон" нахустин хабаргузории хусусии тоҷикист, ки дар бархе аз кишварҳои Шӯравии пешин ва хориҷ аз он сабти ном шуда, мақоми минтақаиро касб кардааст. Хабаргузорӣ дар ҳоли ҳозир бо забонҳои тоҷикӣ, русӣ ва ҳуруфи форсӣ хабар нашр мекунад.

Нишонӣ: Душанбе, кӯчаи Мирзо Турсунзода-45; ҳуҷраи 408

Телефон: (+992) 50 20 777 88; (44) 600 10 60; (37) 881 07 09

E-mail: ozodagonweb@gmail.com


Разработка и дизайн сайта: «SmartMedia»

Ҳафтанома

Cаҳифаҳои вижа

Мо дар Фейсбук!