Сафорати Бритониё надодани раводид ба донишҷӯёнро тасдиқ мекунад

Сафорати Бритониё ба донишҷӯёни тољик беаҳамиятӣ карда, ба онњо раводид намедињад. Ин дар ҳолест, ки ҳамаи ҳуҷҷатҳои дархостшуда пешниҳод шуда аст. Илова бар ин шоҳиди он мешавем, ки ба ҳуҷҷатҳои шаҳрвандони мо чандон аҳамияти ҷидди надода, ҳатто таҷрибаи бонкҳои моро зери суол мебаранд.

Чанд рӯз қабл ширкати «TM-International» як донишҷӯро барои раводид ба сафорати Бритониёи Кабир дар Алмаато фиристод, аммо ҷавоби рад гирифт. Баъди мутолиаи мактуби сафорат мутахассисони тоҷик ва ҳуқуқшиносони Бритониё ба хулоса омаданд, ки сафорат нисбат ба шаҳрвандони Ҷумҳурии Тоҷикистон хунукназарона, дағалона ва бемасъулиятона рафтор намудааст. Онҳо як шаблони омодашуда барои мардуми моро доранд, ки ҳангоми муроҷиат намудан, онро нусхабардорӣ карда, танҳо ному насабро иваз карда, равон мекунанд.

Барои далел аз ҳолати як донишҷӯ, ки вақту маблағи худро дар Алмаато сарф намуда аст, мисол меорем. Муҳаммад Ҷобиров, ки аз 15-уми апрел то 24-уми апрел ба Алмаато барои раводид рафта буд, мактуби рад гирифт. Баъдан, Ҷобиров ба воситаи мутахассисони тоҷик ба ҳуқуқшиноси Бритониё муроҷиат намуд. Мутахассисон бемасъулиятӣ ва муносибати хунукназаронаро бо ин далелҳо исбот мекунанд:

1) Дар мактуби рад, ки сафорат додааст, соли таваллуди Ҷобиров 1997 нишон дода шудааст. Дар ҳоле, ки варианти дурусти он 1994 мебошад;

2) Ҳангоми супоридани ҳуҷҷатҳо дар шиносномаи Ҷобиров мӯҳри рад рӯзи 25.04.2012 гузошта шудааст ва дар мактуби рад бошад, 04.05.2012.  Аз ин сабаб Ҷобиров бовар дорад, ки ҳуҷҷатҳои ӯро дида набаромада, мактуби радро аз рӯи шаблони ҳаррӯзаашон нусха карда доданд;

3) Дар мактуби рад гуфта мешавад, ки далели омӯзиши забони англисиро дар гузашта пешниҳод накарда аст, ҳол он ки ҷавоби расмии имтиҳони TOEFL-и Ҷобиров замима шуда буд. Маълум мешавад, ки кормандони сафорат ҳуҷҷатҳои Ҷобировро ҳатто варақ назадаанд;

4) Дар мактуби сафорат Ҷобировро бо он муттаҳам мекунанд, ки мақсади омӯзиши забони англисиро нанавиштааст. Ҳол он ки Ҷобиров мушаххас нишон дода буд, ки мақсади асосии ӯ дохилшавӣ ба яке аз донишгоҳҳои Бритониёи Кабир мебошад. Илова бар ин аз рӯи нуқтаи назари ҳуқуқшиноси инглис дар ягон ҳуҷҷатнигорӣ ва қонунгузории Бритониёи Кабир нишон додани мақсади таҳсил дархост карда намешавад;

5) Дар мактуб гуфта мешавад, ки донишҷӯ маълумоти мушаххас оид ба баъди хатми мактаби миёна ба чӣ кор машғул буданашро пешниҳод накардааст ва аз рӯи нуқтаи назари сафорат дар ин мӯҳлат бекор будааст. Ин дар ҳолест, ки Ҷобиров Муҳаммад донишҷӯи Донишгоҳи миллии Тоҷикистон мебошад ва инро дар санадҳои пешниҳодкардааш қайд намуда буд;

6) Яке аз сабабҳои рад намудани раводид бекор будани Ҷобиров дониста мешавад. Аммо Ҷобиров донишҷӯ буда, донишҷӯи 18 сола ҳуқуқи кор накарданро дорад ва инро бояд кормандони сафорат дарк намоянд;

Дар мактуб нуктаҳои зиёдеанд, ки шаҳодат медиҳад, сафорати Бритониё ба шаҳрвандони мо аҳамияти ҷиддӣ намедиҳанд.

Мӯҳр