Русский  >>  فارسی  >>  Шанбе 10 декабр 2016, 19:34

Кӯлоб: Теъдоди беморони сил коҳиш меёбад

12 июн 2012, 06:13

Дар  семоҳаи аввали соли равон дар шаҳру навоҳии минтақаи Кӯлоби вилояти Хатлон 266 нафар барои аввалин бор гирифтори бемории сил гаштаанд. Ин рақам дар қиёс ба ҳамин давраи соли гузашта 108 нафар кам будааст. Тули ҳамин муддат 14 бемори сил ба ҳалокат расидааст.

Дар ҳоли ҳозир дар навоҳии минтақа 11 ташхисгоҳи зидди силӣ ва 5 адад рентгени флюорографӣ фаъолият менамоянд. Ба андешаи Мирзоалӣ Миралиев, муовини сардори раёсати тандурустии вилояти Хатлон дар минтақаи Кӯлоб, ошкор намудани гирифторони ин беморӣ маҳз аз ҳамин дастгоҳҳо вобастагӣ дорад. Дар натиҷаи ташхисҳои ахири флюорографӣ, ки 15519 сокини навоҳии минтақа аз он гузаштанд, 120 нафар бемори сил кашф гаштааст.
Тибқи иттилои манбаъ, сил дигар беҳудуд гашта, мубталоёни он дар ҳамаи навоҳии минтақа, гузашта аз ин дар ноҳияҳои кӯҳистони баланду хунук ҳам сироят гаштан дорад. Қисмати зиёди беморон дар шаҳру ноҳияи Кӯлоб, Восеъ ва Ҳамадонӣ будаанд.

Дар ҳамин ҳол, теъдоди гирифторони бемории сил дар шаҳру ноҳияи Кӯлоб нисбат ба нимсолаи аввали соли гузашта 70 нафар коҳиш ёфтааст.  
Бино ба иттилои Аҳмадхон Олимов, директори Маркази мубориза зидди бемории сили шаҳри Кӯлоб, аз аввали сол ин ҷониб дар шаҳру ноҳия 120 нафар нахустин маротиба мубталои бемории сил гаштаанд. Аз ҷумла, 69 нафар дар ҳудуди шаҳр ва 51 каси дигар дар рустои ноҳия расман дар ҳамин Марказ ба қайд гирифта шудаанд, ки нисбат ба ҳамин давраи соли пеш 70 нафар кам мебошад.

Аммо бояд гуфт, ки ин теъдоди дақиқи силзадагон дар ҳамаи шаҳру ноҳия буда наметавонад. Зеро тибқи иттилои манбаъ, дар Маркази мазкур то ҳанӯз таҷҳизоту лавозимоти тиббӣ барои кашфи бемории сил тақрибан мавҷуд нест, ки барои ошкор намудани беморӣ мушкилӣ пеш меорад. «Ба Маркази мубориза бар зидди касалиҳои сил беморон зиёд муроҷиат мекунанд. Дар мо ҳанӯз таҷҳизоти даркорӣ нест. Ҳатто барои акси флюорографӣ маҷбурем беморонро ба марказҳои рентгенологӣ сафарбар кунем. Аз дигар лавозимоти тиббӣ низ танқисӣ дорем. Аз ин хотир, шояд бошанд бемороне, ки ҳанӯз дар қайди мо нагузаштаанд»,- мегӯяд Олимов.

Барои ҳали мушкил Маркази мубориза алайҳи сил ба ҳукумати шаҳр бо мактуби дархостӣ муроҷиат кардааст ва ба андешаи директори марказ, шояд дар мӯҳлати наздик ҳукумати маҳаллӣ кумак намояд. Дар ҳамин ҳол, кормандони марказ аз нарасидани мутахассисони соҳа ва шароити нохуби корӣ низ шикоят доранд.
Маркази мубориза бар зидди бемории сил дар шаҳри Кӯлоб тайи 2 солу 5 моҳ ин ҷониб фаолият дошта, аллакай миёни аҳолӣ бо хизматрасонии муфиду маслиҳатҳои саривақтӣ шинохта шудааст. Бо ташаббуси он дар кӯчаву маҳаллаҳои шаҳр ва рустои ноҳия мунтаззам семинару вохӯриҳо бо аҳолӣ дар мавриди зарари сил ва пешгириву муолиҷаи саривақтии он гузаронида мешавад. Ба андешаи силшинос Олимов «яке аз сабабҳои кам гаштани ин беморӣ миёни аҳолӣ, вобаста ба доир намудани ин гуна вохӯриҳо ва риояи дурусти гигиенаи шахсӣ мебошад, ки кормандони марказ онро миёни ҷомеа фаҳмонда меоянд».

Дар ҳоли ҳозир инчунин Марказҳои зиддисилӣ дар ҳамаи навоҳии минтақа расман фаолият доранд. Аммо мушоҳидаҳо нишон медиҳанд, ки на ҳама масъулин фаъолияти софдилонаро ба роҳ мондаанд. Аммо, ин мавзӯи дигар аст, ки дар наздиктарин фурсат ба он рӯ хоҳем овард.

Аслиддин Достиев


Шарҳи худро бинависед:

Ном:*
E-Mail:
Матни шарҳ:

Матолиби ҳамсон:

Бойгонӣ

«    Декабр 2016    »
ДушСешЧорПанҶумШанЯкш
 1234
567891011
12131415161718
19202122232425
262728293031 


Дар бораи мо

"Озодагон" нахустин хабаргузории хусусии тоҷикист, ки дар бархе аз кишварҳои Шӯравии пешин ва хориҷ аз он сабти ном шуда, мақоми минтақаиро касб кардааст. Хабаргузорӣ дар ҳоли ҳозир бо забонҳои тоҷикӣ, русӣ ва ҳуруфи форсӣ хабар нашр мекунад.

Нишонӣ: Душанбе, кӯчаи Мирзо Турсунзода-45; ҳуҷраи 408

Телефон: (+992) 50 20 777 88; (44) 600 10 60; (37) 881 07 09

E-mail: ozodagonweb@gmail.com


Разработка и дизайн сайта: «SmartMedia»

Ҳафтанома

Cаҳифаҳои вижа

Мо дар Фейсбук!