Русский  >>  فارسی  >>  Шанбе 10 декабр 2016, 02:15

Мавзуна Чориева: Ориёнбонк ҳанӯз мошини ваъдагиро надодааст.

11 октябр 2012, 06:28

11-уми октябр ба унвони «Рӯзи байналмилалии духтарон» эътироф гардидааст. Дар Тоҷикистон соли равон аввалин маротиба аз ин сана дар «Маркази фарҳангии исмоилиён»-и Душанбе ҷашн гирифтанд. Мавзуна Чориева, муштзани маъруфи тоҷик ҳам яке аз иштирокдорони маҳфили мазкур буд. Аз ин фурсати муносиб истифода карда, Озодагон бо дорандаи медали биринҷии Бозиҳои тобистонаи олимпӣ дар Лондон сӯҳбате анҷом дод.

Озодагон: Шунидем, ки ояндаи наздик арусӣ мекунед. Ин тасмими худи Шумо аст ё аҳли хонавода?

Мавзуна Чориева: «Бале, худам тасмим гирифтам, ки бояд ба шавҳар бароям. Аслан ҳар чизеро ки ман мехоҳам модарам ва хешу таборон аз он ҷонибдорӣ мекунанд. Ҳар зан мехоҳад, ки оилаву фарзанд дошта бошад. Ман ҳам доимо орзу мекардам, ки оиладор шавам, соҳиби фарзанд гардам. Ба шавҳар баромадани ман маънои онро надорад, ки аз варзиш дур мешавам. Ҳамеша бо варзиш будам, ҳастам ва мемонам. Ман алакай 20 сола шудам ва агар баъди Олимпиадаи соли 2016 ба шавҳар бароям сину солам ба ҷое мерасад. Иншооллоҳ баъди як фарзанд ёфтанам боз ба варзиш бамегардам ва барои Олимпиадаи соли 2016 омодагӣ мебинам».

Озодагон: Агар рафту шавҳаратон нагузорад, ки ба варзиш машғул шавед, дар он сурат чӣ кор хоҳед кард?

Мавзуна Чориева: «Агар номзади интихобнамудаи ман розӣ намебуд, ки ман варзишгар шавам чор сол пеш маро аз варзиш дур мекард. Мо маслиҳат кардем, ки баъди келини хонадони онҳо шудан, тамринро идома медиҳаму варзишро канор намегузорам. Онҳо ба ин пешниҳод розӣ ҳастанд ва ҳатто дастгирӣ ҳам мекунанд».

Озодагон: Шумо бо волидони дӯстписаратон сӯҳбат кардаед, яъне рафту омад доред?

Мавзуна Чориева: «Бале, ҳар дафъа, ки аз мусобиқаҳо баргардам, бо гулу гулдаста пешвозам мегиранд. Ҳар бор, ки Кӯлоб меравам ба хонаи онҳо рафта аз ҳолашон хабар мегирам. Онҳоро ҳамчун падару модари худам эҳтиром мекунам ва худамро ҳамчун фарзанди онҳо медонам».

Озодагон: Дӯстписаратон ҳам варзишгар аст?

Мавзун
а Чориева: «Бале, кам-кам барои саломатӣ, барои худаш машқ мекунад».

Озодагон: Бо номзадатон хешу таборӣ доред?

Мавзуна Чориева: «Не, хешӣ надорем».

Озодагон: Дар як сӯҳбат гуфта будед, ки дар Олимпиадаи Лондон китфатон лат хӯрдааст, табобат гирифтед?

Мавзуна Чориева: «Не, то ҳол китфам дард мекунад. Ба он хотир табобат нагирифтаам, ки маро бояд аз ҷониби Кумитаи ҷавонон ба Олмон барои муолиҷа мефиристоданд. Ҳоло аниқ нашудааст, ки кай мефиристанд».

Озодагон: Дар Тоҷикистон табобат намегиред?

Мавзуна Чориева: «Китфам чӣ иллате бардоштааст, ки ин ҷо табобат карда наметавонанд, ба ҳамин хотир бояд барои ҷароҳӣ Германия фиристонанд».

Озодагон: Вақте аз Лондон нишони биринҷӣ овардед, бисёриҳо гуфтанд, ки тӯҳфаҳои гаронарзиш медиҳанд. Оё ҳамаи ваъдагиҳо ба шумо расид?

Мавзуна Чориева: «Не, Ориёнбонк ҳанӯз мошини ваъдагиро надодааст. Сарвари кишвар, Ҳизби наҳзати исломии Тоҷикистон, раиси шаҳри Душанбе, раиси шаҳри Қӯрғонтеппа, раиси шаҳри Хуҷанд ба ваъдаашон вафо карданд. Аммо гап сари он намеравад, ки кӣ ба ман чӣ додаст ё медиҳад. Барои ман пеш аз ҳама истиқболи гарми миллати тоҷик муҳим аст».

Озодагон: Қаблан, гуфтед, ки теъдоди духтароне, ки ба варзиш машғул шудаанд ба 58 нафар расидааст. Ба назари Шумо ҳамаи онҳо варзишгари хуб шуда метавонанд?

Мавзуна Чориева: «Ин дар оянда маълум мешавад. Шояд аксари ин духтарон аз рӯи ҳавою ҳавас омада бошанд, лекин ба ҳар сурат аз миёни онҳо ду-се варзишгари хуб тайёр кардан мумкин аст».

Озодагон: Феълан дар куҷо тамрин мекунед?

Мавзуна Чориева: «Бо устодам дар ҳамон толоре, ки пеш машқ мекардем, ҳоло ҳам ҳамон ҷо тамрин мекунем».

Озодагон: Барои тамрин берун аз Тоҷикистон нарафтаед?

Мавзуна Чориева: «Не, то ҳол ба ҳеч куҷо нарафтаам».

Озодагон: Ташаккур барои сӯҳбати самимӣ. Ба мухлисонатон чӣ гуфтан мехоњед?  

Мавзуна Чориева: «Ба мухлисонам пеш аз ҳама саломатӣ тамано дорам. Барои дастгириҳояшон минатдорӣ баён мекунам ва ҳамаи онҳоро ба ҷашни арусиям  даъват менамоям».  

Мусоҳиб: Ибодуллоҳи ТОИР




Шарҳи худро бинависед:

Ном:*
E-Mail:
Матни шарҳ:

Матолиби ҳамсон:


Дар бораи мо

"Озодагон" нахустин хабаргузории хусусии тоҷикист, ки дар бархе аз кишварҳои Шӯравии пешин ва хориҷ аз он сабти ном шуда, мақоми минтақаиро касб кардааст. Хабаргузорӣ дар ҳоли ҳозир бо забонҳои тоҷикӣ, русӣ ва ҳуруфи форсӣ хабар нашр мекунад.

Нишонӣ: Душанбе, кӯчаи Мирзо Турсунзода-45; ҳуҷраи 408

Телефон: (+992) 50 20 777 88; (44) 600 10 60; (37) 881 07 09

E-mail: ozodagonweb@gmail.com


Разработка и дизайн сайта: «SmartMedia»

Ҳафтанома

Cаҳифаҳои вижа

Мо дар Фейсбук!