Русский  >>  فارسی  >>  Сешанбе 6 декабр 2016, 22:59

Бордюжа: “Роҳбарияти Тоҷикистон дар масъалаи пойгоҳ қасдан кашолакорӣ намекунад”

26 март 2013, 08:43

Николай Бордюжа, дабири кулли Созмони паймони амнияти дастаҷамъӣ (СПАД) сармоягузории Русияро барои таҷҳизонидани сохторҳои қудратии Тоҷикистону Қирғизистон ба манфиати Русия арзёбӣ кардааст.

Бордюжа дар суҳбат бо нашрияи “Комерсант” гуфтааст, бе истифодаи имконоти сохторҳои қудратии Тоҷикистону Қирғизистон муборизаи самаранок бо қочоқи мухаддирот ва харидуфурӯши одамон ғайриимкон аст. Аз ҷумла дабири кулли СПАД таъкид кардааст, ки пойгоҳи низомии 201-ум ҳам амнияти Тоҷикистон, ҳам Русия ва умуман минтақаро таъмин мекунад.

Дар ҷавоб ба суоли “Коммерсант”, ки чаро Тоҷикистон бо вуҷуди сармоягузориҳои Русия ба ин кишвар, зимни тасвиби созишномаи пойгоҳи 201-ум ба кашолакорӣ роҳ медиҳад, Бордюжа изҳори боварӣ намудааст, ки роҳбарияти Тоҷикистон қасдан ин корро накарда истодааст: “Ман ягон бор эҳсос накардаам, ки роҳбарияти Тоҷикистон зимни татбиқи ин ё он тавофуқот ба кашолакорӣ роҳ додааст. Роҳбарияти Тоҷикистон ҳамеша ба ҳамкорӣ бо Русия ва дигар кишварҳои узви СПАД майл дорад. Дар масъалаи тасвиби созишномаи пойгоҳи 201-ум мушкил дар равандҳои маъмурӣ аст, ки дар ҳар кишвар ҷой доранд."

Ин дар ҳолест, ки Владимир Путин, раисиҷумҳури Русия, созишнома дар бораи будубоши низомиёни рус дар Тоҷикистонро барои тасвиб ба парлумони кишвараш ирсол намудааст.

Созишнома дар бораи будубоши 30-солаи пойгоҳи низомии Русия дар Тоҷикистон, ки моҳи октябри соли гузашта аз ҷониби президентҳои Тоҷикистону Русия, Эмомалӣ Раҳмон ва Владимир Путин имзо гардид, то ҳол аз ҷониби парлумони ин кишварҳо тасвиб нашудааст. Ахиран Ҳамроҳхон Зарифӣ, вазири умури хориҷии Тоҷикистон, изҳор дошт, ки созишнома дар бораи ҳузури пойгоҳи 201-ум аз дигар тавофуқоти Раҳмону Путин дар бахшҳои муҳоҷирату энергетика ҷудо нест ва дар назар аст, ки ин созишномаҳо ҳамзамон тасвиб гарданд.

Аммо тавре нашрияи “Коммерсант” бо такя ба манобеаш дар мақомоти Русия менависад, Валерий Герасимов, муовини аввали вазири мудофеи ин кишвар ахиран зимни сафараш ба Душанбе хостааст, созишнома дар бораи пойгоҳ ҳар чи зудтар тасвиб шавад ва Маскав интизор дорад, ки Душанбе ин корро давоми як моҳи оянда анҷом медиҳад. Ба навиштаи “Коммерсант” Маскав аллакай ду шарти асосии Душанбе, дар мавриди тамдиди ҳузури беқайди муҳоҷирони тоҷик ва лағви боҷи маҳсулоти нафтиро иҷро кард. Дар баробари ин, “Коммерсент” бо такя ба манобеаш дар мақомоти Русия иттилоъ медиҳад, ки акнун Душанбе аз Маскав хостааст, дар бораи сармоягузории бештар ба гидроэнергетика ва таҷҳизонидани артиши Тоҷикистон созишнома имзо шавад. Аммо Маскав изҳор доштааст, ки ба ивази пойгоҳи 201-ум ба ин гузаштҳо моил нест.


Шарҳи худро бинависед:

Ном:*
E-Mail:
Матни шарҳ:

Матолиби ҳамсон:


Дар бораи мо

"Озодагон" нахустин хабаргузории хусусии тоҷикист, ки дар бархе аз кишварҳои Шӯравии пешин ва хориҷ аз он сабти ном шуда, мақоми минтақаиро касб кардааст. Хабаргузорӣ дар ҳоли ҳозир бо забонҳои тоҷикӣ, русӣ ва ҳуруфи форсӣ хабар нашр мекунад.

Нишонӣ: Душанбе, кӯчаи Мирзо Турсунзода-45; ҳуҷраи 408

Телефон: (+992) 50 20 777 88; (44) 600 10 60; (37) 881 07 09

E-mail: ozodagonweb@gmail.com


Разработка и дизайн сайта: «SmartMedia»

Ҳафтанома

Cаҳифаҳои вижа

Мо дар Фейсбук!