Русский  >>  فارسی  >>  Якшанбе 4 декабр 2016, 17:14

Хонандаҳои синфи як ҳам пайёми президентро тамошо карданд

11 май 2013, 10:21

Дилошӯб Орифзода

Ҳамасола пайёми президент Эмомалӣ Раҳмон ба Маҷлиси олии кишвар дар охирҳои моҳи апрел ироа мегардад. Ин чорабинии муҳими сиёсӣ тариқи тамоми шабакаҳои ҷумҳурӣ навобаста аз шакли моликияташон (имсол ҳатто дар кӯча, яъне дар экрани таблиғотие, ки дар маркази шаҳри Хуҷанд воқеъ аст) мустақиман намоиш дода мешавад.

Рӯзе, ки пайёми президент тариқи шабакаҳои телевизионӣ намоиш дода мешавад, хонандаҳо ва донишҷӯёни муассисаҳои олии касбӣ онро дар синфхонаҳо, толорҳо ҷамъ шуда тамошо мекунанд. Соли ҷорӣ низ ин «суннат» давом кард. Дар тамошои пайёми имсола баъзе муассисаҳои таълимӣ «тағироте» дароварданд. Яъне суханронии сарвари давлатро ба хонандаҳои синфҳои ибтидоӣ низ намоиш додаанд. Ин хабар хандаовар менамояд, аммо ҳақиқат аст. Масалан дар мактаби таҳсилоти миёнаи умумии рақами 14-и шаҳри Хуҷанд ин ҳолат шудааст. Шояд дар дигар манотиқ низ ин қишрӣ ҷомеаро ба тамошои пайём ҷалб карда бошанд, аммо ба мо торик аст.

Барои рӯшанӣ андохтан, ки дар кадом асос хонандаҳои макотиби миёна бояд пайёмро тамошо кунанд, бо котиби матбуотии Вазорати маориф Маҳмудхон Шоев ҳамсӯҳбат шудем. Ӯ ба «Озодагон» гуфт: "мувофиқи телефонограммае, ки ба унвони тамоми муассисаҳои таълимӣ равона шуда буд, бояд дар ҳамаи муасссисаҳои таълимӣ намоиши мустақими паём ташкил мешуд. Ростӣ ман эътибор надодам, ки дар телефонограма синну сол навишта шуда буд ё на». Ба суоли барои чӣ ба хонадаҳои синфи якум ҳам пайёмро намоиш доданд, чунин посух дод, ки “барои хонандагони синфҳои ибтидоӣ набояд ин кор шуда бошад, чунки онҳо хӯрд ҳастанд. Мардумро медонед-ку, мардуми мо аз рӯи ҳамон мақоле, ки «Салла биёр, гӯӣ калла меоранд» кор мекунанд. Дар баъзе ҷо мумкин ҳамин хел ҳолатҳо рӯй дода бошад”.

Директори мактаби таҳсилоти миёнаи умумии рақами 6-и шаҳри Хуҷанд Файзуллоҷон Файзиев мегӯяд, дар мактаби онҳо паёми президентро танҳо хонандаҳои синфҳои болоӣ тамошо карданд: "Бо фармоиш ва супориши ҳукуматдорони маҳал, дар муасисаҳои таълимӣ, дар муассисаҳои истеҳсолӣ, умуман беморхонаҳо бо таври оммавӣ мардум дар толорҳо нишаста аз телевизиони ягона паёми президентро тамошо карданд. Дар мактаби мо низ ҳар сол хонандаҳои синфҳои 9, 10, 11 дар маҷлисгоҳ паёми президенти кишвар Эмомалӣ Раҳмонро гӯш мекунанд. Дар соли ҷорӣ низ мо шароит фароҳам сохтем ва хонандаҳо аз ҳисоби дарс, яъне аз соати 9 то 12 паёмро тамошо карданд”.

Дар макотиб тамошо кардани паёмро бархе аз сиёсатшиносон хуб арзёбӣ мекунанд. Далелашон ин аст, ки аз овони мактабхонӣ ҷавон алакай аз сиёсат бохабар мегардад. «Ба сиёсат ҳамроҳ кардани кӯдакон хуб аст, чун кӯдак донистанаш зарур аст, ки кӣ сардори ҳукумат, кӣ президент аст? Чи қадаре ки одамон бо сиёсат шинос шаванд, сиёсатмадоронро донанд ва моҳияти кори онҳоро нағз дарк кунад, дар оянда аз ҷиҳати сиёсӣ ин гуна одамон, одамони босавод мешаванд»- мегӯяд сиёсатшинос Очилбой Зоҳидов.

Номбурда дар идома меафзояд, ки “умуман барои моҳияти сиёсатро дурусттар дарк кардан ва пайдо гардидани тафаккури сиёсӣ хоси синни тақрибан аз 17-18 сола боло аст. Лекин умуман вақте сиёсат тамоми ҳаёти имрӯзаи ҷомеаро муайян мекунад, хоҳед нахоҳед бояд кӯдакон ҳам ҳамроҳ шаванд. Чун ки кай ҳамроҳ мешаванд, агар имрӯз ҳамроҳ нашаванд? Онҳо бояд президентро шиносанд, рамзу симоҳои Тоҷикистонро донанд. Суруди давлатиро аз худ кунанд. Ин қадамҳои аввали ба сиёсат ҳамроҳ шудани мардуме, ки дар ҳудуди Тоҷикистон зиндагӣ мекунанд ва ҳуқуқи шаҳрвандӣ доранд, мебошад”.

Аммо бархе аз сиёсатмадорон ва ҳуқуқшиносон ин амалро ғайриқонунӣ арзёбӣ мекунанд ва мегӯянд, ки дар давлати демократӣ ин рафтори мансабдорон шармандагӣ аст. Файзинисо Воҳидова мегӯяд: “Ҳамасола ҷомеа чизи наверо аз паёми президент интизор аст. Мо мехоҳем онро тамошо кунем, гӯш кунем. Лекин бо он тарзе, ки имрӯз дар вилояти Суғд ба роҳ мондаанд, ин ғайриқонунӣ аст. Чун иҷборан ҳатто дар мактабҳои таҳсилоти ҳамагонӣ, ки онҳо аз сиёсат дур ҳастанд, майнаи онҳоро бо сиёсат банд кардан аз рӯи мантиқ нест. Дар ҳоле ки онҳо ҳатто намефаҳманд, ки дар бораи чӣ гап меравад. Лекин иҷборан бор кардан ба мардум, ин албатта аз ҷиҳати ҳуқуқӣ ғайриқонунӣ мебошад”.

Ҳуқуқшинос Файзинисо Воҳидова мегӯяд, тайи чанд соли охир дар вилояти Суғд ин ҳолат давом дорад. "Тамоми мақомоти давлативу ҷамъиятӣ, ташкилоту муасисаҳо, ҳатто донишгоҳҳо ва муассисаҳои таълимии вилояти Суғд дар рӯзи паёми президент ба парлумон, аз фаъолият боз дошта мешаванд, яъне аз фаъолияти касбии худ ва ҳама дар назди телевизор нишаста, пайём тамошо мекунанд",- мегӯяд хонум Воҳидова.

Дар ВАО ҳамасола иттилоте нашр мегардад, ки дар рӯзи паёми президент мактабҳо, донишгоҳҳо, беморхонаҳо ва ғайра фаъолиятии асосии худро монда дар утоқ, маҷлисгоҳ синфхонаҳо паём тамошо мекунанд. Бону Файзинисо Воҳидова дар сӯҳбат ба «Озодагон» гуфт, ки дар ин рӯз судяҳо ҳам «истироҳат» мекунанд: "Чун ман ҳуқуқшинос ҳастам, дар рӯзи паём ягон мурофиаҳои судӣ баргузор намегардад ва ошкоро судяҳо баён мекунанд, ки дар рӯзи паёми президент тамоми судяҳои вилояти Суғд ҷамъ шуда, дар шӯрои адлия паём тамошо мекунанд,- афзуд Воҳидова.

Пас аз анҷоми паём кам муассисаҳое пайдо мегарданд, ки онро шарҳу тавзеҳ диҳанд. Аммо сарвари мактаби рақами 6-и Хуҷанд ба «Озодагон» гуфт, ки ҳамасола пас аз ба охир расидани суханронии президент он масъалаҳое, ки ба мактабу маориф алоқаманд аст, ба хонандаҳо муфасалтар мефаҳмонанд: «Имрӯз буҷаи ҷумҳурӣ воқеан касод аст ва дар натиҷаи касодии ин буҷаи кишвар он маблағе, ки барои хизматрасонии камуналӣ, масалан, барои мактабҳои давлатӣ мебоист 92 ҳазор сомонӣ ҷудо кунад, вале муттассифона аз касодии ҳамин буҷет ҳамагӣ 16 ҳазору 600 сомонӣ ҷудо карда шудааст ва ин маблағи 16 ҳазору 600 сомонӣ барои пардохти маблағҳои истифода бурдаи барқ, об, партов, телефон, молҳои конселярӣ, таъмири мактаб кифоят намекунад. Бинобар ин ба хонанадаҳо муроҷиат намудем, ки ҳамон «хайрия», яъне кӯмакпулие, ки волидайн барои ободии мактаб, барои таъмири мактаб ҳарсол пардохт менамоянд давом диҳанд, чаро ки он маблағи барои хизматрасониҳои комуналӣ ҷудо карда шуда, барои мактаб кифоят намекунад- гуфт Файзуллоҷон Файзиев.

Дар идомаи суҳбат Файзиев афзуд, ки дар вақти фаҳмондадиҳӣ хонандаҳо суолҳо медоданд. Ӯ мегӯяд, онҳо мегуфтанд, «барои чӣ ҳамасола аз баромадҳои раиси ҷумҳур маълум мешавад, ки Тоҷикистон тараққӣ кардааст, пешравӣ ҳаст, буҷҷа зиёд мегардад ва даромаднокии халқ, даромаднокии пулию молӣ зиёд шудаанд, аммо барои мактаб пул кам ҷудо карда мешвад». Директори мактаб гуфт, “ба онҳо мегӯям, ки ба ин суоли шумо президент худ ҷавоб додааст: - Имрӯз он шароити иқтисодие, ки Тоҷикистон дорад ва илова бар ин шаш моҳ дар кишвар маҳдудияти барқ мавҷуд аст ва бисёр сармоягузорони хориҷӣ аз набудани барқ ба кишвари мо сармоягузорӣ намекунанд. Барои ҳамин мо имрӯз кӯшиш карда истодаем, ки ҳаддалимкон НБО-и «Роғун» сохта ба истифода дода шавад. Баъди сохтани он, агар Тоҷикистон бо барқ ба пуррагӣ таъмин шавад, пас метавонем ба сармояи хориҷӣ умед бандем.

Рӯзи паёми президент ба намози ҷумъа рост омад ва то ҷое, ки иттилоъ дорам дар тамоми масоҷиди ҷомеи вилояти Суғд маърӯзаи муллоҳо ба паём бахшида шуд. Пас аз як ҳафта низ дар аксар масҷидҳо мавзӯи сӯҳбат паёми президент буд. Масалан, дар масҷиди ҷомеи «Нури ислом», ки имомхатиби он ҳоҷи Ибодулло Калонзода мебошад, 3-юми май низ аз суханрониҳои раиси ҷумҳур борҳо ёдовар шуд. Ва дар ин рӯз ба масъалаи саркашии ҷавонон аз хизмат дар сафи қувваҳои мусаллаҳ нигаронии худро баён кард ва як ҳодисаро нақл намуд. Ӯ гуфт, ки кормандони камисариати ҳарбӣ як ҷавонро хостанд ба хизмат сафарбар намоянд, аммо пас аз он, ки фаҳмиданд навиштан наметавонад, гуфтаанд, ки чи гуна нафаре, ки савод надорад ба дифои ватан бифиристем ва ӯро ҷавоб додаанд.





Шарҳи худро бинависед:

Ном:*
E-Mail:
Матни шарҳ:
Посух додан
  • Хучанд

  • 11 май 2013 13:00
  • Гуруҳ: Гости
  • Қайд: --
  • Мақом:
  • Шарҳҳо: 0
  • Матлаб: 0
Агар мачбур накунанд ки пайемро гуш кунед ба хости худ хичи ки гуш намекунад
Посух додан
  • Гуруҳ: Гости
  • Қайд: --
  • Мақом:
  • Шарҳҳо: 0
  • Матлаб: 0
ин чи шармандагист дар тчк бояд хама рахмоновро тамошо кунанд ин дар кадом акли одами чой мегирад оё беаводи аз инхам гузарад? чаро баромади намояндагони дигар хизбхоро дар телевизион нишон намедихад аммо баромади рахмрновро бояд хама тамошо кунад кучост демократия? ба касе маъкул бошад тамошо кунадба касе не ба рохи худ рафтан гирад на инки бо таври мачбури бояд тамошо кард

Матолиби ҳамсон:

Бойгонӣ

«    Декабр 2016    »
ДушСешЧорПанҶумШанЯкш
 1234
567891011
12131415161718
19202122232425
262728293031 


Дар бораи мо

"Озодагон" нахустин хабаргузории хусусии тоҷикист, ки дар бархе аз кишварҳои Шӯравии пешин ва хориҷ аз он сабти ном шуда, мақоми минтақаиро касб кардааст. Хабаргузорӣ дар ҳоли ҳозир бо забонҳои тоҷикӣ, русӣ ва ҳуруфи форсӣ хабар нашр мекунад.

Нишонӣ: Душанбе, кӯчаи Мирзо Турсунзода-45; ҳуҷраи 408

Телефон: (+992) 50 20 777 88; (44) 600 10 60; (37) 881 07 09

E-mail: ozodagonweb@gmail.com


Разработка и дизайн сайта: «SmartMedia»

Ҳафтанома

Cаҳифаҳои вижа

Мо дар Фейсбук!