Главная > Тоҷикистон, Иқтисодӣ > Амонатбонк бинои навашро ба Чин дар гарав гузоштааст

Амонатбонк бинои навашро ба Чин дар гарав гузоштааст


19 январ 2016, 15:25. Разместил: hd
Руҳулло Ҳакимзода, раиси бонки давлатии “Амонатбонк” мегӯяд, бинои навбунёди ин ниҳоди молиро, ки бояд сохтмонаш то соли 2017 анҷом ёбад, дар гарави Чин гузоштаанд.

Ҷаноби Ҳакимзода имрӯз, 19 январ дар нишасти матбуотӣ дар посух ба суоли “Озодагон” гуфт, барои анҷоми сохтмони бинои нав аз Бонки давлатии рушди Чин қарз гирифтаанд. Ӯ афзуд, ба ивази ин қарз, ки бо фоизҳои паст барои 10 сол дода шудааст, бинои бунёдшавандаи бонкро гарав гузоштаанд.

Ба иттилои раҳбари "Амонатбонк", қарзи Чинро аз ҳисоби маблағҳое, ки дар гардиши бонк қарор дорад, бозпас хоҳанд дод. Руҳулло Ҳакимзода гуфт, феълан таҳхона ва ошёнаи якуми бинои нав бунёд шуда, анҷоми сохтмон соли 2017 дар назар аст.

Сохтмони бинои нави Амонатбонк моҳи марти соли гузашта оғоз гардида, тибқи лоиҳа аз 10 ошёна, бо 180 утоқи корӣ, 20 утоқи машваратӣ, маҷлисгоҳ бо 180 ҷойи нишаст, конференсзал барои 100 нафар, ошхона ва тавақкуфгоҳи зеризаминии 2-ошёна иборат хоҳад буд. Дар маҷмӯъ бинои нав барои фаъолияти 750 нафар кормандон бо шароити мусоиди корӣ пешбинӣ шудааст.

Вернуться назад