Кабирҷон Ҷӯраев, муовини аввали раиси Кумитаи ҷавонон, варзиш ва сайёҳии Тоҷикистон, сарусадо дар бораи он ки ҷавононро барои мулоқот бо раисиҷумҳур аз қабл омода мекунанд, беасос донист. Ӯ, ки рӯзи ҳаштуми июли соли ҷорӣ дар нишасти хабарӣ суҳбат мекард, гуфт, ба мулоқоти президент натанҳо хизматчиёни давлатӣ аз корхонаву идораҳои пойтахт, балки ҷавонони фаъол аз манотиқи кишвар низ даъват шуда буданд.
“Шумораи нафароне, ки мехостанд дар мулоқоти президент ширкат варзанд, 12 ҳазор буд. Вақте шумораи иштирокчиёнро муайян карда, ба президент пешниҳод кардем, ҳарчанд дар он ҷавонони фаъол номнавис шуда буданд, аммо президент онҳоро хат заданд ва ба ҷавонони мақомоти маҳаллӣ такя карданд. Аз 2200 ҷавон, 1700 нафар аз шаҳру навоҳии кишвар буданд, ки аксаран омӯзгору олимони ҷавон ва гирандагони стипендияи президентӣ буданд",-гуфт ӯ.
Оқои Ҷӯраев афзуд,
"чӣ гуна як ҷавоне, ки муҳоҷир аст ва бекор буда бо шуғле фаро гирифта нашудааст, дар мулоқоти ҷаноб иштирок мекунад? Оё сатҳи ин қабил ҷавонон ба сатҳи мулоқот ба президент баробар аст? Ҳамон ҷавононе, ки дар мулоқот бо президент ширкат доштанд, имрӯзҳо дар минтақаҳои худ бо дигар ҷавонон вохӯриҳо мегузаронанд.” Ин дар ҳолест, ки Моҳрухсор, хабарнигори “Минбари халқ”, нашрияи расмии Ҳизби халқӣ-демократии Тоҷикистон, ба Кабирҷон Ҷӯраев гуфт, дар рӯзи мулоқоти раисиҷумҳур бо ҷавонон шоҳиди он будааст, ки нафарони сабтиномшуда имкони савол доданро доштаанду халос. Вай гуфт, вақте ба назди баландгӯяк омаду хост, ба раисиҷумҳур пешниҳодҳояшро ироа кунад, як нафар монеи суҳбати ӯ шудааст.
“Ба ман гуфтанд, ки аз назди баландгӯяк дур шавам. Зеро танҳо нафароне ҳаққи савол доданро доштаанд, ки пешакӣ рӯйхат шудаанд”,-афзуд ӯ.
Иддаое, ки Кабирҷон Ҷӯраев рад карда ва гуфт, ин суҳбат озодона сурат гирифта касе ҳам монеи суҳбати ҷавонон нашудааст.
Мӯҳр