Суоли вакилони Зайд Саидов: Чаро сирри тафтишот фош шуд?
Се вакили мудофеи Зайд Саидов -- соҳибкор ва раҳбари боздоштшудаи “Тоҷикистони нав” гузориши телевизониеро, ки дар бораи таҷовузи як духтари навраси рус аз сӯи нафари таҳти ҳимояташон ҳикоят мекард, ғайриқонунӣ донистанд. Ин гузориш шоми 30-юми сентябр аз барномаи “Ахбор”-и телевизионҳои Тоҷикистон намоиш дода шуд, ки дар он Зайд Саидов ба таҷовузи духтари ноболиғ муттаҳам мешуд.
Шӯҳрат Қудратов, яке аз се вакили мудофеъ, гуфт, ин кори мақомот бидуни ризоияти вакилони мудофеи Зайд Саидов сурат гирифта, махфӣ будани парвандаи нафари таҳти ҳимояташонро зери суол бурдааст. Вай афзуд, аз болои ин кори мақомот ба Додситонии кулл шикоят бурдаанд: “Мо аз додситони кулл Шерхон Салимзода хостем, дар доираи ваколатҳои ба ӯ додашуда ҳолати ба миёномадаро ҳаматарфа мавриди санҷиш қарор дода, нисбат ба ин қонуншиканиҳо ҷораҳо андешад.”
Вай дар идома гуфт, “мо дар ҳайрат мондем, чун ин парванда мӯҳри махфӣ дорад ва аз мо дар бораи фош накардани сирри тафтишот забонхат гирифтаанд. Лекин онҳо худашон дар барномаи “Ахбор” сирри тафтишотро фош карданду парвандаи махфиро дар телевизион нишон доданд, ки мо аз ин амалӣ мақомот комилан розӣ нестем.”
Мусоҳиби мо мегӯяд, “агарчӣ дар асоси парвандаи нави таҷовуз ба номус алайҳи Зайд Саидов айб эълон нашудааст, аммо мақомот ӯро дар содир намудани ҷиноят гунаҳкор ҳисобиданд. Мо аз ин амалҳои ғайриқонунии тафтишот розӣ нестем ва худи ҳамин рӯз аз болои он ба Додситонии кулл шикоят ҳоҳем бурд ва нусхаи шикоятро ба Оҷонсии мубориза бо фасоди молӣ месупорем, чун тафтиши ин парванда ба уҳдаи ин ду мақомот аст. Ин дар тафаккури мардум ҷо намудани хабарҳо дар бораи ҷиноят содир намудани Зайд Шерович ва паст задани шаъну шарафи ӯ дар назди мардум аст.”
Ин вакили мудофеи Зайд Саидов таъкид кард, баъд аз машварат бо дигар ҳуқуқдонҳои маъруф Шабакаи аввали Тоҷикистонро, ки ин наворро намиш дод, ба додгоҳ хоҳанд кашид. Зайд Саидов, соҳибкори муваффақ ва раҳбари гуруҳи ташаббускори таъсиси Ҳизби Тоҷикистони нав, нимаи дувуми моҳи майи соли ҷорӣ ҳангоми бозгашт аз Фаронса боздошт гардид. Мақомот ӯро дар бисёрзанӣ, ришват, қаллобӣ, тамаъҷӯӣ, сӯистифода аз мақом, таҷовуз ба номуси ду ноболиғ муттаҳам мешуморанд.
Дар акс: Исҳоқ Табаров, Фахриддин Зокиров ва Шӯҳрат Қудратов, се вакили мудофеи Зайд Саидов
Мӯҳр
ТАҚВИМ
« Март 2024 » |
---|
Душ | Сеш | Чор | Пан | Ҷум | Шан | Якш |
---|
| 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |