11 фев 2014 14:58Оcиёи Марказӣ / Тоҷикистон

Ҳимояти Бонки ҷаҳонӣ аз болоравии нархи барқ дар Тоҷикистон

Лора Так, ноиби раиси Бонки Ҷаҳонӣ дар умури Аврупо ва Осиёи Марказӣ, зимни як нишасти хабарӣ дар Душанбе ҷонибдории ин созмони молиявиро аз афзоиши нархи барқ дар Тоҷикистон таъйид намуд.

Лора Так ҳадафи маслиҳаташонро барои боло бурдани нархи барқ дар Тоҷикистон, муътадил сохтани вазъи молии умури энергетикаи кишвар гуфта, таъкид намуд, ки Бонки ҷаҳонӣ ҳамзамон ба ҳукумати кишвар маслиҳат медиҳад, ки барои ҳимояи табақаи камбизоат зимни фурӯши барқ сабукиҳо ҷорӣ созад.

Ин дар ҳолест, ки Даврон Исҳоқов, муовини раиси ширкати “Барқи тоҷик”, эълон кард, ки моҳҳои наздик нархи истифода аз нерӯи барқ дар Тоҷикистон боло намеравад. Ҷаноби Исҳоқов, ки рӯзи 5 феврал дар ҳузури хабарнигорон сӯҳбат мекард, гуфт, “Барқи тоҷик” барои боло бурдани нархи барқ ба ҳукумат пешниҳоде накардааст ва афзуд, агар нархи барқ боло ҳам равад, он дар як ҳаҷми кам хоҳад буд.

Аммо роҳбарияти Вазорати энержӣ ва Хадамоти зиддиинҳисорӣ дар ин робита гуфтанд, масъалаи нархи барқро гуруҳи махсуси корӣ мавриди омӯзиш қарор додааст, ки феълан идома дорад. Усмоналӣ Усмонов, вазири энержӣ ва захираҳои об дар Тоҷикистон, зимни нишасти хабарии 30 январ изҳор дошта буд, ки бо қарори ҳукумат кумисюни махсус ба омӯзиши ин масъала машғул аст ва ояндаи наздик нархи нави барқ дар Тоҷикистон пешниҳод хоҳад шуд.

Вазир болоравии нархи барқро барои беҳбуди вазъи молии умури энержӣ муҳим арзёбӣ кард. Ӯ таъкид намуд, феълан нархи барқ дар Тоҷикистон арзонтарин дар минтақа аст. Ин дар ҳолест, ки тарифҳои феълии барқ дар Тоҷикистон моҳи апрели соли 2011 ҷорӣ шуданд, ки тибқи он нарх барои мардум 11 дирам сари ҳар киловат муайян шудааст.

Мӯҳр

Хабарҳои монанд: