Боздошти қочоқчиёни қирғиз ва номуайянии боз шудани марз
Ду шаҳрванди Қирғизистон ба иттиҳоми қочоқи коло аз Тоҷикистон ба ватан боздошт шудаанд.
Хадамоти марзбонии Қирғизистон мегӯяд, ин шаҳрвандони кишвараш қасди итиқоли ғайриқонунии маҳсулоти ширию ширинӣ аз Тоҷикистон ба ватанро доштаанд. Ба иттилои манбаъ, маҳсулоти мазкур мусодира шуда, ҳаҷми умумии он 60 ҳазор соми қирғизиро ташкил медиҳад.
Ин дар ҳолест, ки қаблан низ ин ниҳод гуфта буд, танҳо дар давоми рӯзи 27 феврали соли ҷорӣ 4 шаҳрванди Қирғизистон, аз ҷумла ду сокини вилояти Бодканд, ҳаммарзи вилояти Суғд боздошт шудаанд, ки қасди интиқоли 10 тона меваи қоқ ва 2 тона қурут аз Тоҷикистон ба ватанро доштанд. Дар пайи тирпаронии 11 январи соли ҷорӣ миёни марзбонони Тоҷикистону Қирғизистон мақомоти Бишкек бо вуҷуди дар қаламрави Хоҷаи Аълои ноҳияи Исфара сурат гирифтани ин ҳодиса, сарбозони тоҷикро муттаҳам доранду марзи худро ба таври якҷониба бастаанд.
Дар музокироти ҳайатҳои Тоҷикистону Қирғизистон, ки рӯзи 3 март дар Душанбе баргузор шуд, мақомоти Бишкек барои боз кардани гузаргоҳҳои марзии ин кишвар бо Тоҷикистон, розӣ шудаанд. Аммо ҳанӯз санаи дақиқи боз шудани марз миёни Тоҷикистону Қирғизистон маълум нест. Дар ҳамин ҳол, Тоқон Маметов, муовини сарвазири Қирғизистон, ки дар музокироти ҳайатҳои ду кишвар ҷониби Бишкекро раҳбарӣ мекунад, рӯзи 5 март дар суҳбат бо расонаҳои хабарии кишвараш хабари боз шудани марзро рад карда, гуфтааст, боз шудани марз пешниҳоди Тоҷикистон буда, ҳоло мақомоти Қирғизистон дар ин бора ба хулосае наомадаанд.
Мӯҳр
ТАҚВИМ
« Апрел 2024 » |
---|
Душ | Сеш | Чор | Пан | Ҷум | Шан | Якш |
---|
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | |