Аслов вазъияти Украинаро бо воқеаҳои солҳои 90-и Тоҷикистон муқоиса кард
Сироҷиддин Аслов, вазири умури хориҷии Тоҷикистон, ки дар Маскав қарор дорад, рӯзи 8 март бо ҳамтои русаш – Сергей Лавров ҳамкориҳои дуҷониба ва воқеаҳои ахири Украинаро баррасӣ кардааст.
Ҷаноби Аслов вазъияти кунунии Украинаро ба ҳодисаҳои солҳои 90-и кишвар муқоиса карда, таъкид намудааст, “Тоҷикистон таҷрибаи сӯитафоҳумҳои сиёсиро дорад, ки кишварро ба буҳрони шадиди иқтисодӣ рӯбарӯ карда буд”.
Ин сафари нахустини расмии Сироҷиддин Аслов ба Маскав ва он ҳам бо даъвати Сергей Лавров дар пайи воқеаҳои Украина сурат мегирад. Агарчӣ то кунун мақомоти баъзе аз кишварҳои Осиёи Марказӣ, аз ҷумла Узбакистон дар робита ба воқеаҳои Украина мавқеи худро рӯшан карданд, вале Душанбе ҳамоно сукут ихтиёр карда буд. Бархе аз коршиносон мегӯянд, эҳтимол Душанбе ин фурсатро мунтазир буд, ки бо мақомоти Русия чӣ гуфтанашро машварат кунад, то ҳам лаъл ба даст ояду ҳам ёр наранҷад.
Сергей Лавров, вазири умури хориҷии Русия, гуфтааст, Маскав аз шарикони худ даъват менамояд, онро яке аз тарафҳои даргир дар нооромиҳои Украина наҳисобанд. “Мо омодаем, сари мизи гуфтушунид биншинем. Вале бояд ин гуфтугӯ воқеӣ ва дур аз ҳар гуна талошҳо барои нишон додани мо ҳамчун як тарафи даргир бошад”,-афзудааст ӯ. Расонаи Вести.ру менависад, вазирони умури хориҷии ду кишвар ба хулосае расидаанд, ки амалкарди гуруҳҳои мухолифи Украина аз доираи қонун берун мебошад. “Мо вазъияти феълии Украинаро ба баҳс кашидем ва бар ин мавқеъ ҳастем, ки набояд миллигароёни ифротии нооромкунандаи вазъият ташвиқ шаванд”,-изҳор доштааст вазири умури хориҷии Русия.
Ҷаноби Лавров дар идома гуфтааст, пойгоҳи низомии 201 манофеи Маскавро дар минтақа ҳимоят карда, ҳамроҳ бо низомиёни тоҷик амнияти Тоҷикистонро таъмин хоҳад кард. Вай афзудааст, рӯзҳои наздик қарордоди байни ҳукумати ду кишвар дар бораи бардоштани боҷи гумрукии сӯзишворӣ ва тамдиди муҳлати будубоши муҳоҷирони кории тоҷик дар Русия мавриди амал қарор хоҳад гирифт.
Тибқи иттилои расонаҳои русӣ, Лавров қабл аз шурӯи мулоқот бо Аслов дар суҳбат бо хабарнигорон гуфтааст, Душанбе шарики стратегии Маскав мебошад ва ибрози умедворӣ кардааст, ки дар оянда низ хоҳад буд. Сироҷиддин Аслов низ дар навбати худ гуфтааст, ин мулоқот нишонаи идома ёфтани гуфтугӯи сиёсӣ ва рушди ҳамкориҳои дуҷонибаи ду кишвар мебошад.
Мӯҳр
ТАҚВИМ
« Апрел 2024 » |
---|
Душ | Сеш | Чор | Пан | Ҷум | Шан | Якш |
---|
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | |