Тадқиқот: Фелдшер писари кист?
Усмоналӣ Ғайратов, ки ба латукӯби Шаҳбол Мирзоев, сарбози маъюбшудаи тоҷик муттаҳам мешавад, пайвандиаш бо яке аз мақомҳои додситонии кулли Тоҷикистон маълум гардидааст.
Радиои “Имрӯз” дар робита ба ин ҳодиса тадқиқоти журналистӣ анҷом дода, маълум кардааст, ки Усмоналӣ Ғайратов писари Муҳаммадшариф Ғайратов, корманди бахши конселярии Додситонии кулли кишвар мебошад.
Ба иттилои манбаъ, Муҳаммадшариф Ғайратов сокини ҷамоати Сари кишти ноҳияи Рӯдакӣ буда, дар гузашта аз фанни ҷуғрофия дар мактаб ба донишомӯзон дарс мегуфтааст ва давоми чанд соли охир то корманди бахши консерялии додситонӣ расидааст.
Шаҳбол Мирзоеви 23 сола фориғуттаҳсили Донишгоҳи ҳуқуқ ва тиҷорати шаҳри Хуҷанд мебошаду ҳамагӣ 7 моҳ қабл довталабона ба хидмати низомӣ рафтааст. Ӯ шоми 8 марти соли ҷорӣ аз сӯи ҳамхидматаш дар қисми ҳарбии марзбонии 2620 мавриди “латтукӯб”-и шадид қарор гирифта, сутунмуҳрааш мешиканад. Додситонии низомии гарнизони шаҳри Душанбе, ки ҳоло ин қазияро тафтиш дорад, мегӯяд, гардани Мирзоев дар пайи куштии маҷбурӣ шикастааст.
Ин дар ҳолест, ки Кумитаи давлатии амнияти миллии Тоҷикистон бо пахши як иттилоия қасдан латукӯб шудани сарбоз Шаҳбол Мирзоевро такзиб ва айбдор будани масъулини Сарраёсати қушунҳои сарҳадии кишвар дар ин қазияро рад кард. Инчунин ин ниҳод писари мансабдори Додситонии кул будани фелдшер Ғайратовро рад карда, таъкид намуда буд, ки баръакс сарбози ҷабрдида Шаҳбоз Мирзоев, хеши наздики яке аз собиқ шахсони мансабдори Додситонии кулли Тоҷикистон мебошад.
Дар иттилоияи ин ниҳод омада буд, “пеш аз ҳодисаи осебгирии Мирзоев Шаҳбол дар вақти гӯштингирӣ Ғайратов ягон маротиба мавриди лату кӯб қарор надошт. Ҳолати бо теғ (лезва) буридани пойҳои Мирзоев Ш. Н. ҳам ба ҳақиқат наздикӣ надорад, танҳо баъди гирифтани осеб аз ҷониби табибон барои муайян кардани ҳискунии пойҳои ў бо сўзан пай монда шудааст.”
Аммо худи сарбоз ин ҳамаро рад карда, мегӯяд, фелдшер ӯро беасос мавриди латтукӯби шадид қарор дода, ҳангоми ба ин ҳолат гирифтор шуданаш ҳам, барои интиқол ба беморхона иҷоза надодааст: “Гуфтам, ба аком занг зада гӯед, маро ба беморхона барад, вале гуфтанд, дар сурате занг мезнем, ки гӯи худат баъд аз кашидани нос аз болои стулча ғалтидаӣ. Ман розӣ шудам, то зуд ба беморхона интиқол ёбам, аммо бо вуҷуди ин занг назаданд.”
Мӯҳр
ТАҚВИМ
« Апрел 2024 » |
---|
Душ | Сеш | Чор | Пан | Ҷум | Шан | Якш |
---|
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | |