Нақли президент дар бораи президенте, ки гиря мекарду мегурехт
Александр Лукашенко, раисиҷумҳури Беларус, дар суҳбат бо шабакаи телевизионии “Дожд”-и Русия чӣ гуна ба ҳамтои фирории қирғизаш Қурмонбек Боқиев паноҳгоҳ доданашро нақл кардааст. Лукашенко гуфтааст, вақте раисиҷумҳури пешини фирории Қирғизистон дар қаламрави Қазоқистон бесарпаноҳ буду ҳама аз ӯ рӯй гардонда буданд, натавонистааст, ба дархости ҳамтояш ҷавоби рад диҳад.
“Ба ӯ занг задам, гиря мекард. Гуфт, “Саша, ту барои ман ҳеч гоҳ дӯст набудӣ, аммо ман ҳоло ҳамроҳ бо кӯдаконам дар як ҷангал паноҳ бурдаем ва намедонем чӣ кор кунем. Ҳадди ақал фарзандони маро наҷот деҳ!”,-афзудааст раисиҷумҳури Беларус.
Ба гуфтаи Александр Лукашенко, собиқ раисиҷумҳури фирории Қирғизистон он замон тавассути ҳавопаймои яке аз ширкатҳои Беларус ба Минск оварда шуд: “Сабаби аслии ҳавопаймо фиристодани мо дар он буд, ки ҳамроҳи Боқиев ҳангоми гуфтугӯи телефониамон писари хурдиаш – Николай ҳузур дошт. Вазъи ӯро дарк кардан мумкин буд, чун маълум аст, вазъияти шахсе, ки бо кӯдаконаш дар ҷангал қарор дорад.”
Собиқ раисиҷумҳури Қирғизистон, ки ҳоло дар Беларус ба сар мебарад, моҳи феврали соли 2013 аз сӯи Додгоҳи низомии Бишкек ба 24 соли зиндон маҳкум шудааст. Мақомоти қудратии қирғиз алайҳи ӯ дар ғайбаш ин ҳукмро эълон карда, онро дар сӯиқасдҳои сиёсии пурсарусадо айбдор медонанд.
Қурмонбек Боқиев соли 2005 дар интихобот ба рақибонаш пирӯз шуда, барои 4 сол ба курсии раёсати Қирғизистон нишаст. Баъдан дар соли 2009 низ интихоботи раёсати ҷумҳурӣ баргузор шуд, ки дар он низ ғолиб баромад. Аммо то он замон ӯ кореро анҷом надода буд, ки розигии мардумро ба даст орад. Дар пайи зиёд шудани норозигии сокинон дар ҳар ҷо бар зидди Боқиев тазоҳурот барпо шуданд. Ин дар ҳоле буд, ки дарсадии шуғли аҳолӣ дар ин давра поин рафта, қиматии хадамоти иҷтимоӣ яку якбора боло бурда шуд.
Дар пайи тазоҳуроти эътирозии Бишкек дар соли 2010, ки тақрибан 100 нафар ҷавон кушта шуданд, мардум ҳукумати Боқиевро муттаҳам карданд, ки бар зидди аҳолӣ аз нерӯ истифода бурд ва ҳамин тавр баъди фирораш алайҳи ӯ парвандаи ҷиноӣ боз шуд. Дар баробари ин, Ҷонибек Боқиев, бародари Курманбек Боқиев низ дар ташкили гуруҳи ҷиноӣ, қаллобӣ, созмондиҳии ошӯбҳо ва тасарруфи қудрат дар моҳи апрели соли 2010 дар Қирғизистон айбдор шуда, ба ҳукми абад аз озодӣ маҳрум гардид.
Ахиран ду бародари раисиҷумҳури пешини Қирғизистон, ки ҳоло дур аз ватан ба сар мебаранд, бо ирсоли номае ба унвони президенти кунунии кишварашон иҷозаи вуруд хоста буданд. Дар номаи Марат ва Одил, бародари Боқиев ба Алмосбек Атамбоев, раисиҷумҳури Қирғизистон, аз ҷумла омадааст, “ба мо иҷоза диҳед, дубора ба ватан баргардем. Чи тавре маълум аст, алайҳи мо ҳеч иттиҳомоте равона нашудааст. Мо ватани худро пазмон шудаему мехоҳем, онҷо зиндагӣ кунем. Бигзор ҳар нафаре муҷрим аст, назди қонун ҷавоб диҳад.”
Дар давраи раёсати Боқиев дар Қирғизистон бародаронаш -- Марат сафири ин кишвар дар Олмон ва Одил дар Чин буданд.
Мӯҳр
ТАҚВИМ
« Март 2024 » |
---|
Душ | Сеш | Чор | Пан | Ҷум | Шан | Якш |
---|
| 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |