Баҳси Озода бо Мирзиёев: "Ин қадар азияти кашидаам кам буд?"
Озода Саидзода, овозхони шинохтаи узбакистонӣ, ки қаблан чун Озода Нурсаидова ҳунарнамоӣ мекард, ахиран Шавкат Мирзиёев, нахуствазири кишварашро зиёд танқид ва ӯро сабабгори тамоми мусибатҳояш медонад.
Ба қавли Озода мушкилиҳои ӯ замоне оғоз шуд, ки аз ворид шудан ба тими Мирзиёев даст кашид. Озода бори аввал ошкоро дар бораи нахуствазир дар шабакаи иҷтимоӣ гуфт. 1 май вай дар саҳифаи Твиттераш навишт: “Ҷаноби Мирзиёев! Бо шарофати Шумо ин қадар сол азият кашиданам кам буд? Ҳоло мехоҳед манзили маро хароб кунед?”
Баъди ин шарҳ Озода ба бахши узбакии радиои “Озодӣ” гуфт, мақомот қасд дорад, манзили ӯро дар ноҳияи Яккасаройи шаҳри Тошканд, ки иборат аз 8 сотих аст, вайрон кунад. Дар як мусоҳиба бо Уилл Райт, докторанти Донишгоҳи Калифорния, ки Uznews.net нашр кардааст, Озода гуфтааст, дар амри хароб кардани манзилаш Мирзиёев мустақим даст дорад. “Баъди тасмими ман дар бораи ба додгоҳ кашидани Шавкат Мирзиёев акнун мехоҳад манзили маро вайрон кунад. Ба ӯ писанд нест, ки ҳоло ҳам ман зиндагии хуб дорам. Ман ҳайронам, одаме, ки метавонад ба Сарқонуни Узбакистон тағйирот ворид созад, худаш қонунро намедонад ва онро бераҳмона нақз мекукунад”,-гуфтааст Озода.
Дар ин мусоҳиба Озода Саидзода гуфта, ки расман литсензияи сарояндагии ӯро касе лағв накарда, ин хабарро шифоҳӣ дарёфт кардааст: “Ин як стратегияи одиест барои репрессияи чеҳраҳои эҷодӣ. Баромадҳои ту дар ҳамаи радио, ТВ ва дигар ВАО манъ аст. Барои баргузории консерт иҷозат намедиҳанд. Ва ҳамаи ин шифоҳӣ сурат мегирад. Яъне, вақте ба назди мақомоти марбута рафта мепурсӣ, ки литсензия дорӣ, аммо чаро барои фаъолият иҷоза намедиҳанд, онҳо ба фармони шифоҳӣ аз боло ишора мекунанд”.
Ба қавли Озода, наздики 10 сол мешавад, ки бо шарофати нахуствазир наметавонад фаъолияти эҷодияшро идома бидиҳад ва ба саҳна барояд. Ӯ гуфта, Шавкат Мирзиёевро аз барвақт мешиносад: “бубахшед, аммо ҳоло ҳамаи маълумот дар бораи ӯро наметавонам ишфо созам. Ин маълумотҳоро ман он вақт ба хадамоти марбута таслим мекунам, ки агар ман ва ё наздиконам зери фишор ё бедодгарӣ қарор бигирем”.
Ба ин суол ки оё тасмими ба сиёсат ворид шуданро надорад, Озода ҷавоб дода, “ҳеч вақт дар бораи сиёсат фикр накардаам. Шояд дар оянда фикр мекунам”.
Мӯҳр
ТАҚВИМ
« Апрел 2024 » |
---|
Душ | Сеш | Чор | Пан | Ҷум | Шан | Якш |
---|
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | |