08 июл 2014 15:37Оcиёи Марказӣ / Узбакистон

“Духтари президент дар яке аз кишварҳои Назди Балтик ҷашни зодрӯз дорад”

Пойгоҳи хабарии “Узметроном” мегӯяд, духтари бузурги Ислом Каримов, раиси ҷумҳури Узбакистон, дар ҳоли ҳозир дар яке аз кишварҳои Назди Балтик қарор дошта, 42-солагияшро дар канори одамони барояш арзишманд таҷлил мекунад.

Ин дар ҳолест, ки тайи чанд моҳи охир, гуфта мешуд, Гулнора Каримова мавриди хашми падараш қарор гирифта, дар ҳабси хонагӣ дар Тошканд аст. Ҳатто гуфта шуд, Ислом Каримов Гулнораро задааст.

Ҳоло чаҳор шабакаи телевизионии марбут ба Гулнора Каримова аз фаъолият боз монда, бархе аз ширкатҳои вобаста ба духтари раисиҷумҳури Узбакистон мавриди бозҷӯии мақомоти қудратии узбак қарор гирифтанд. Каримова ин овозаҳоро тасдиқ ва ин иқдомро ташаббуси Кумитаи амнияти Узбакистон номида буд. Ӯ бо нашри як навори видеоӣ дар саҳифаи Твиттераш кормандони Хадамоти амнияти миллии Узбакистонро бо он муттаҳам карда буд, ки аъзои оилаашонро иҷозаи мулоқот бо падар намедиҳанд.

Гулнора Каримова моҳи феврали соли ҷорӣ бо ирсоли номае ба унвони Uznews.net, гуфта буд, “Кумитаи давлатии амнияти миллии Узбакистон тамоми афроде, ки мехоҳанд, ба ману духтарам кумак кунанду наздикии хонаам, мешаванд, боздошт мекунад.” Ӯ дар шарҳи гуфтаҳояш афзуда буд, ҳамроҳ бо духтари 15-солааш аз ибтидои соли ҷорӣ дар ҳабси хонагӣ қарор дорад. Маъмурини Кумитаи амнияти Узбакистон рӯзи 17 феврали соли ҷорӣ ба хонаи хонум Каримова “ҳамла” карда, тамоми афроди наздики ӯ, аз ҷумла ҳамсарашро, ки онҷо ҳузур доштанд, боздошт намуда, бо худ бурдаанд.

Вале баъд аз талошҳои зиёд духтари раиси ҷумҳури Узбакистон рӯзи 18 январи соли ҷорӣ дар саҳифаи Твиттераш навишт, ки Ислом Каримов ӯро дар соли нави милодӣ ба ҳузур пазируфта, дар амалӣ гаштани нақшаҳои нави тарроҳияш орзуи муваффақият кардааст. Гуфта мешавад, ин нахустин дидори хонум Каримова бо падараш баъд аз шикотяҳои тӯлонии ӯ ба шумор рафта, бархе онро зинаи аввали раҳоияш аз буҳроне ном бурданд, ки тирамоҳи соли гузашта духтари 42-солаи Ислом Каримов аз он азият мекашид. Вале духтари раисиҷумҳури Узбакистон ин мулоқотро поёни буҳрони гирифторшудааш надонисту гуфта буд, ҳанӯз ҳам бархе аз ёрони ӯ дар боздоштгоҳи муваққати Кумитаи амнияти миллии Узбакистон ба сар мебаранд.

Ахиран хабаргузории EurasiaNet навишт, ки бо гузашти беш аз панҷ моҳ аз баҳамзании “Империяи тиҷорӣ”-и Гулнора Каримова бархе аз корхонаҳои ӯ дар Узбакистон акнун зери раҳбарии хӯҷаинҳои нав ба фаъолият шурӯъ кардаанд. Як хонандаи ин сайт бо такя ба “манбаи муътамад”-и худ гуфта, бо эҳтимоли зиёд ин дороиҳо ба дасти хоҳари Гулнора – Лола хоҳад гузашт. Ин ҳам дар ҳолест, ки муносибати Гулнора Каримова бо хоҳараш чандон хуб нест. Ӯ дар чанд навиштааш дар шабакаҳои иҷтимоӣ хоҳарашро зери тозиёнаи танқид қарор дода буд.

Мӯҳр

Хабарҳои монанд: