Вазорати хориҷӣ гуфт, ҳеч пойгоҳи низомӣ дар қаламрави Узбакистон мустаққар намешавад

Вазорати умури хориҷии Узбакистон бо нашри изҳороте эълон кард, дар ҳудуди кишвараш ҳеч пойгоҳи низомии хориҷӣ мустаққар нахоҳад шуд.

Ин дар ҳолест, ки чанд рӯз қабл расонаҳо аз идомаи гуфтугӯҳои мақомҳои баландмақоми Узбакистону Амрико дар мавриди ҷойгир намудани пойгоҳи ҳарбии ИМА дар Тирмиз хабар дода буданд. “Мутобиқи Консепсияи фаъолияти сиёсати беруна Узбакистон дар қаламрави худ ба мустаққар намудани ҳеч пойгоҳи низомӣ иҷоза нахоҳад дод”,-омадааст дар изҳороти ВУХ.

Торнамои Uzmetronom аз ин пеш хабар дода буд, ки Иёлоти муттаҳидаи Амрико барои мустаққар кардани пойгоҳи нави ҳарбӣ дар шаҳри Тирмиз омодааст, солона ба Узбакистон 1 миллиард доллар бидиҳад. “Расман шояд он ҳамчун маркази логистика фаъол шавад, зеро консепсияи қабулкардаи Узбакистон ҷой додани пойгоҳи низомии кишвари хориҷ дар қаламрави кишварро иҷоза намедиҳад. Аммо дар асл агар ҷонибҳо ба мувофиқа биёянд, ин пойгоҳи низомии комил хоҳад буд, ки ҳадафаш танҳо назорати Афғонистон набуда, ҷамъоварии иттилои ҷосусӣ аз ҳамаи кишварҳои Осиёи Марказӣ ва қисман Русияву Чин мебошад”,-навишта буд Uzmetronom.
Мӯҳр