«Мо медонем, ки роҳи бозгашт ба Иттиҳоди Шӯравӣ нест ва барои мо роҳҳои нави алоқа лозим аст ва ин роҳҳоро албатта, ҷавонон бояд ёбанд».
Дар ин бора зимни як нишасти матбуотӣ сарвари иҷроияи хазинаи байналмилалии ҳамкории гуманитарии ИДМ Армен Смбатян иброз дошт. Ҷаноби Смбатян, ки дар доираи сафараш ба Тоҷикистон бо президент Эмомалӣ Раҳмон мулоқот дошт, пас аз ин вохӯрӣ бо журналистон гуфт, мо асосан масъалаҳои башардӯстонаро бо Раҳмон мавриди баҳс қарор додем. Инчунин маорифу фарҳанг ва соҳаи ҷавонони ин иттиҳод низ аз мавзӯъҳои сӯҳбат ба шумор рафтанд.
Армен Смбатян афзуд, ки «мулоқоти имрӯзаи мо бо президент нишон медиҳад, ки сарвари давлати шумо ба соҳаи башардӯстиву фарҳанг ва ҷавонон, инчунин маориф, ки яке аз пояҳои устувори ҳар миллату давлат маҳсуб меёбад, таваҷҷӯҳи хосса дорад.Ман умед дорам, ки аз ин пас раванди нави ҳамкориҳои давлатҳои узви ИДМ дар соҳаи башардӯстӣ шурӯъ мегардад». Бино ба қавли Смбатян тибқи нақша дар назар аст, ки дар Тоҷикистон барномаҳое аз қабили «Анҷумани зистшиносони ҷавон», «Вохӯрии волонтёрҳо» ва «Барномаи Помир - Ҷақалтой» роҳандозӣ шаванд.
Мӯҳр