Парвози аввалин гуруҳи зоирон ба Макка ва ҳалли мушкили шиносномаи биометрӣ
Кумитаи дин, танзими анъана ва ҷашну маросимҳои миллии Тоҷикистон мегӯяд, гуруҳи нахустини зоирони тоҷик рӯзи 10 сентябр ба Арабистони Саудӣ сафар хоҳанд кард.
Парвози ин гуруҳ тавассути ҳавопаймоҳои ширкатҳои “Тоҷик Эйр” ва “Сомон Эйр” аз фурудгоҳҳои Хуҷанду Душанбе анҷом мешавад. Сафари зоирони тоҷик дар ҳоле сурат мегирад, ки қаблан онҳо бо мушкили гирифтани шиносномаҳои биометрӣ мувоҷеҳ шуданд. Он вақт масъулони Кумитаи дин гуфтанд, бар асоси талаби Арабистони Саудӣ сафари зоирони тоҷик танҳо бо шиносномаҳои биометрӣ имконпазир аст. Афшини Муқим,сухангӯи Кумитаи дин, танзими анъана ва ҷашну маросимҳои миллии Тоҷикистон мегӯяд, ҳоло теъдоди зиёди зоирон шиносномаҳои биометрии худро дарёфт карда, ба сафари қарибулвуқуашон омодагӣ мегиранд. Вай афзуд, зоирони дигар ҳам дар чанд рӯзи баъд соҳиби шиносномаҳои биометрӣ хоҳанд шуд.
Шиносномаи биометрӣ се соли пеш омода ва роҳандозӣ шуда, муҳлати истифодаи он даҳ сол аст. То роҳандозии ин навъи шиносномаҳо паспортҳои одии хориҷӣ маъмул буд, ки барои панҷ сол дода мешуд. Мақомот ҳангоми роҳандозии шиносномаҳои биометрӣ гуфта буданд, шиносномҳои одии хориҷӣ ҳам то замони анҷоми муҳлаташон ба кор меоянд.
Ҳаҷ аз ҷумлаи аркони панҷгонаи дини мубини Ислом аст, ки барои ҳар мусалмони ба балоғатрасида ва тавоно фарз мебошад. Ҳамасола аз Тоҷикистон ҳудуди шаш ҳазор барои зиёрати Хонаи Худо ба Макка мераванд. Мақомоти тоҷик мегӯянд, пардохти маблағи ҳаҷи имсола 18 ҳазору 164 сомониро ташкил медиҳад ва ба ин хизматрасониҳо пули чипта ё билети ҳавопаймо (рафту бозгашт), маблағи авоид (боҷи шоҳӣ), иҷораи меҳмонхона дар шаҳрҳои Маккаву Мадина, се бор ғизо дар як рӯз, хидмати роҳбаладон, кумаки аввалияи тиббӣ, эмгузаронӣ зидди касалиҳои сирояткунанда, ҷузвдон, либос ва ғайраҳо дохил аст.
Мӯҳр
ТАҚВИМ
« Март 2024 » |
---|
Душ | Сеш | Чор | Пан | Ҷум | Шан | Якш |
---|
| 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |