22 дек 2014 11:33Тоҷикистон / Иҷтимоӣ

Оғози мурофиаи сарбози латтукӯбшуда дар Додгоҳи низомии гарнизони шаҳри Душанбе

Додгоҳи низомии гарнизони шаҳри Душанбе баррасии шикояти хонаводаи Шаҳбол Мирзоев, сарбози латтукӯбшуда ва маъюбро, ки аз Раёсати қушунҳои сарҳадии Кумитаи давлатии амнияти миллии Тоҷикистон ҷуброн талаб доранд, оғоз мекунад.

Нахустин мурофиаи додгоҳии хонаводаи Мирзоевҳо бо Раёсати қушунҳои сарҳадии кишвар рӯзи 24 декабр соати 9:00 дар бинои Додгоҳи низомии гарнизони Душанбе баргузор мешавад. Аризаи даъвогии пайвандони Шаҳбол Мирзоев, сарбози латтукӯбшуда ва маъюби тоҷик, барои талаби ҷуброн аз Сарраёсати қушӯнҳои сарҳадии Кумитаи давлатии амнияти миллии Тоҷикистон ба раҳбарии генерал Раҷабалӣ Раҳмоналӣ ноябри соли равон ба додгоҳ ирсол шудааст.

Хонаводаи Мирзоевҳо дар ин аризаи худ, ки барои бори сеюм аст, ба додгоҳ фиристода шуд, аз Сарраёсати қушӯнҳои сарҳадӣ 97 ҳазор ҷуброни зарари моддӣ ва 144 ҳазор сомонӣ зарари маънавӣ талаб доранд. Ин талаби ҷуброн аз Сарраёсати қушунҳои сарҳадии Тоҷикистон дар ҳолест, ки раҳбари ин ниҳод генерал Раҷабалӣ Раҳмоналӣ зимни аёдати Шаҳбол дар беморхона ва низ тариқи нома пардохт шудани хазинаи табобати ӯро аз сӯи давлат ваъда дода буд. Аммо хонаводаи Мирзоевҳо мегӯянд, генерали тоҷик ба гуфтаҳои худ вафо накардааст.

Дилшод Ҷӯраев, вакили мудофеи хонаводаи бар ин аст, ки маҳз бояд ҷубронро Сарраёсат пардохт кунанд, ҷуброн фарзанди зерҳимояи ӯ аз сӯи хидматчии ин ниҳод латту кӯб гардидааст. Аммо Ҷӯраев аз он нигаронӣ дорад, ки ин аризаи онҳо барои руёнидани ҷубронпулӣ аз сарраёсат бори сеюм аст, бо ҳар баҳона қабул намешавад.

Шаҳбол Мирзоеви 23-сола, сокини деҳаи Понғози ноҳияи Ашт ва фориғуттаҳсили Донишгоҳи ҳуқуқ ва тиҷорати шаҳри Хуҷанд, соли гузашта довталабона ба хидмати низомӣ рафта буд. Ӯ шоми 8 марти соли ҷорӣ аз сӯи ҳамхидматаш дар қисми ҳарбии марзбонии 2620 мавриди латтукӯби шадид қарор гирифта, сутунмуҳрааш мешиканад. Додситонии низомии гарнизони шаҳри Душанбе низ баъд аз таҳқиқи ин қазия эълон карда буд, “гардани Шаҳбол Мирзоев дар натиҷаи маҷбуран гуштӣ гирондани ӯ бо кӯҳнасарбоз - Усмоналӣ Ғайратов шикастааст”.

Мӯҳр

Хабарҳои монанд: