22 дек 2014 11:42Тоҷикистон / Сиёсат / Тема дня

Туркия сабаби боздошти Қувватовро эълон кард

Умаралӣ Қувватов, раҳбари созмони мамнуъшудаи “Гуруҳи 24”, ки 19-уми декабр аз манзили зисташ дар Туркия аз ҷониби мақомоти амниятӣ боздошт шуд, дар нақзи қоидаҳои будубош дар ин кишвар муттаҳам мешавад.

Дар ин бора аз қавли Умаралӣ Қувватов созмонҳои ҳомии ҳуқуқи башар хабар дода, афзудаанд, то ҳол ба ҷуз нақзи қоидаҳои будубош айби дигаре алайҳи ӯ эълон нашудааст. Қувватов тасдиқ карда, ки воқеан муҳлати қайдаш дар Туркия ба охир расидааст.

Ба иттилои манобеъ рӯзи 19 декабр дар баробари Қувватов се тан аз ҳамроҳонаш -Ҳусайн Ашурови 33-сола, Суҳроб Тураеви 36-сола ва Абдурашид Ҳомидови 25-сола боздошт шудаанд, ки аз онҳо ҳамчун узви созмони дар Тоҷикистон мамнӯъшудаи “Гуруҳи 24” ном бурда мешавад.

Созмонҳои ҳомии ҳуқуқ аз мақомоти Туркия риояи ҳуқуқи боздоштшудагонро талаб намуда, зикр мекунанд, ки Қувватов барои дарёфти мавқеи гуреза ба дафтари дахлдори Созмони Миллали Муттаҳид муроҷиат карда, феълан интизори натиҷааш аст.

Дар Тоҷикистон Умаралӣ Қувватов ва аъзои “Гуруҳи 24”, ки 9-уми октябр аз ҷониби Додгоҳи Олӣ экстремистӣ эълон шудааст, дар ҷиноятҳои вазнини зидди сохти конститутсионӣ муттаҳам мешаванд. Қаблан Додситонии генералии Тоҷикистон гуфт, “прокуратураи генералӣ маводи ҷамъовардашударо оид ба фаъолияти “Гурӯҳи 24” мавриди омӯзиш қарор дода, муайян намуд, мақсади асосии “Гуруҳи 24” бо роҳи зиддиконститутсионӣ ғасб кардани ҳокимияти давлатӣ мебошад. Қувватов ва дигар намояндагони ин гуруҳ дар баромадҳои хусусияти ифротгароёнаи (экстремистидоштаи) худ мардуми Тоҷикистонро ба бетартибиҳои оммавӣ, рӯирост ба ғасб кардани ҳокимияти давлатӣ бо роҳи зӯроварӣ, яъне ба содиркунии ҷиноятҳои махсусан вазнин ба муқобили асосҳои сохти конститутсионӣ даъват мекунанд.

Ин ниҳод таъкид кард, ки баробари ин Умаралӣ Қувватов барои ҷиноятҳои дигар, аз қабили қаллобӣ ва азхудкунии амволи ғайр, дар кофтуков қарор дорад.

Мӯҳр

Хабарҳои монанд: