Намояндаи Кумитаи амният гуфт, ҷуброни зарар ба Шаҳболро Усмоналӣ Ғайратов пардозад
Зоиршо Назиров, намояндаи Сарраёсати қушунҳои сарҳадии Кумитаи давлатии амнияти миллӣ зимни мурофиаи навбатии даъвои хонаводаи Шаҳбол Мирзоев, сарбози латту кӯбшуда барои рӯёнидани зарари моддӣ ва маънавӣ аз ин ниҳод, аз додраси парванда хост, ин даъво рад карда шавад.
Ин дар ҳолест, дар мурофиаи нахустин, ки 24 декабр дар Додгоҳи низомии гарнизони шаҳри Душанбе баргузор шуд, Назиров изҳор дошт, зарари моддиро хоҳанд пардохт. Хонаводаи Шаҳбол Мирзоев аз сарраёсат 97 ҳазор сомонӣ ҷуброни зарари моддӣ ва 144 ҳазор сомонӣ зарари маънавӣ талаб кардаанд.
Хабарнигори “Озодагон”, ки ҷараёни мурофиаи рӯзи 26 декабрро мушоҳида мекард, хабар дод, Зоиршо Назиров гуфтааст, дар расонидани зарари моддӣ ва маънавӣ ба Шаҳбол - куҳнасарбоз Усмоналӣ Ғайратов ва Гулрухсор Ширинова, навбатдори нуқтаи тиббии қисми низомии 2620 гунаҳкоранд. Ӯ дархост карда, онҳо дубора ба ҷавобгарӣ ҷалб шаванд. Зоиршо Назиров ҳамчунин аз додрас хост, масъалаи хароҷоти маблағе, ки барои табобти Шаҳбол дар Русия сарф шудааст, бо ташхисҳои гузаронидашуда, “дида баромада шавад”. Аммо Гулчеҳра Холматова, вакили мудофеи Шаҳбол Мирзоев баъд аз анҷоми мурофиа дар суҳбат ба “Озодагон” дархостҳои Зоиршо Назировро беасос хонда гуфт, “дар маҷмӯъ харҷи табобати зерҳимояаш ҳам дар Тоҷикистон ва ҳам дар Русия ҳамагӣ 97 ҳазор сомониро ташкил медиҳад, ки ӯ дар ин бора аллакай расман ба додгоҳ ҳуҷҷат пешниҳод кардааст”.
Гулчеҳра Холматова иброз дошт, тибқи қонунгузории Тоҷикистон барои ҷуброни зарари моддӣ ва маънавӣ нисбат ба зерҳимояаш, Сарраёсати қушунҳои сарҳадии Кумитаи давлатии амнияти миллӣ ҷавобгар аст: “Дар моддаҳои 1083, 1804-и Кодекси граждании Тоҷикистон чунин муқарарот пешбинӣ шудааст, ки аз ҳисоби муассиса ҷуброн пардохт мегардад”.
Раисикунадаи мурофиаи додгоҳӣ то рӯзи душанбеи 29 декабр танаффус эълон кард. Дар мурофиаи навбатӣ баъд аз баромади айбдоркунандаи давлатӣ масъалаи қабул гардидан ва ё нагардидани дархости Сарраёсати қушунҳои сарҳадии Кумитаи давлатии амнияти миллӣ баррасӣ мегардад.
Шаҳбол Мирзоеви 23-сола, сокини деҳаи Понғози ноҳияи Ашт ва фориғуттаҳсили Донишгоҳи ҳуқуқ ва тиҷорати шаҳри Хуҷанд, соли гузашта довталабона ба хидмати низомӣ рафта буд. Ӯ шоми 8 марти соли ҷорӣ аз сӯи ҳамхидматаш дар қисми ҳарбии марзбонии 2620 мавриди латтукӯби шадид қарор гирифта, сутунмуҳрааш мешиканад. Додситонии низомии гарнизони шаҳри Душанбе низ баъд аз таҳқиқи ин қазия эълон карда буд, “гардани Шаҳбол Мирзоев дар натиҷаи маҷбуран гуштӣ гирондани ӯ бо кӯҳнасарбоз - Усмоналӣ Ғайратов шикастааст”.
19 июни соли ҷорӣ Додгоҳи ҳарбии гарнизони Душанбе Усмоналӣ Ғайратовро дар латту кӯби Шаҳбол Мирзоев гунаҳкор дониста, нуҳ сол аз озодӣ маҳрум кард. Бар асоси ҳукми додгоҳ, Гулрухсор Ширинова -- навбатдори нуқтаи тиббии қисми низомии 2620 низ муҷрим шинохта шуда, даҳ дарсади маоши яксолааш ба фоидаи давлат рӯёнда хоҳад шуд.
Мӯҳр
ТАҚВИМ
« Апрел 2024 » |
---|
Душ | Сеш | Чор | Пан | Ҷум | Шан | Якш |
---|
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | |