26 янв 2015 14:47Тоҷикистон / Иҷтимоӣ

Махфират Хидирзода: Зуроварӣ дар оилаҳо нишонаи зурии инсон нест

Махфират Хидирзода, раиси Кумитаи кор бо занон ва оилаи Тоҷикистон имрӯз, 26 январ зимни як нишасти хабарӣ дар Душанбе аз коҳиш ёфтани ҳолатҳои хушунату зуроварӣ нисбат ба занҳо хабар дод.

Хонум Хидирзода гуфт, соли 2014 дар муқоиса ба як соли пеш амалҳои зуроварӣ дар оила 217 ҳолат кам ба қайд гирифта шудааст. Номбурда афзуд, соли гузашта 2 ҳазору 391 ҳолати зӯроварии хонаводагӣ ба қайд расидааст, дар ҳоле ки соли 2013 ин рақам 2 ҳазору 608 ададро ташкил медод.

Афзоиши корҳои тарғиботиву фаҳмондадиҳӣ миёни хонаводаҳоро раиси Кумитаи занҳо сабаби аслии коҳиш ёфтани хушунати оилавӣ арзёбӣ намуд. Ӯ гуфт, зуроварӣ дар оилаҳо ҳаргиз нишонаи зурии инсон нест: “Чун ки вай аз зурӣ истифода мебарад. Дар оила пеш аз ҳама муҳаббату ҳамдигарфаҳмӣ лозим аст ва хонаводаҳо бояд орӣ аз зуровариҳо бошанд. Мо хоҳем нахоҳем зуроварӣ таъсири равонии худашро ҳам ба зуровар, ҳам ба ҷабрдидаи зуроварӣ ва ҳам ба фарзандон мерасонад. Ҳоло Вазорати умури дохилӣ дар ин самт бисёр нағз кор карда истодаанд, аз ҳисоби ин вазорат 5 зан дар минтақаҳо ба масъалаҳои зуроварӣ кор мекунанд. Масалан, агар пештар як нафар дар бораи зуроварӣ ё проблеммае, ки дар оилааш шудааст, мегуфт, ӯро дигар хел қабул мекарданд. Имрӯз аллакай муҳит дигар шудааст. Проблеммаҳоро руйпуш кардан лозим нест, балки барои ҳалли онҳо, ки хоҳ нисбати зан аст ё мард, мусодат кардан даркор”.

Махфират Хидирзода дар суҳбат ба “Озодагон” таъкид намуд, онҳо кушиш мекунанд баҳсҳои хонаводагиро, ки дар пайи хушунату зуроварӣ сар задаанд, то ба додгоҳ нарасида ҳал намоянд. Ӯ мегӯяд, баъди даъват ва суҳбату машваратҳояшон бо хонаводаҳо дида мешавад, ки онҳо ҳамдигарро бахшида, ҳамдигарфаҳмӣ ба миён омадааст.

Мӯҳр

Хабарҳои монанд: