07 фев 2015 12:42Тоҷикистон / Сиёсат

(АКСУ ВИДЕО) Пидром дар бораи тоҷикон: Душман он қадар сар бурид, ки теғаш кунд шуд

Абдулатифи Пидром, раҳбари Ҳизби кунгураи миллӣ ва намояндаи маҷлиси Афғонистон ҷумъаи 6 феврал бо баргузории як ҳамоиш дар шаҳри Кобул аз таъсиси “Шӯрои олии ҳамбастагии тоҷикони Афғонистон” хабар дод.

Дар ҳамоиш зикр шуд, шӯро аз чанд бахш иборат хоҳад буд ва ҳадафаш муттаҳид кардани тамоми тоҷикони давлати исломӣ ва ҳимоят аз ҳуқуқ ва ҳувияти онҳо мебошад. Дар нахустин ҷаласаи шӯро шиорҳое монанди “Дифоъ аз ҳуқуқи занон ва кӯдакони кишвар, ормони асосии “Шӯрои олии ҳамбастагии тоҷикони Афғонистон” аст”, “Шӯрои олии ҳамбастагии тоҷикони Афғонистон” бо ҳар гуна падидаи нажодпарастӣ, шовинистӣ ва нажодпарастӣ мухолиф буда, бо он пайкор менамояд” сар дода шуд.

Пидром аз саркуб ва “аз бозӣ” берун кардани лидерони тоҷики Афғонистон нигаронӣ карда гуфт, “гарданҳои бисёре зада шуд, то теғи душманд кунд шуд. Ин содда набуд. Тоҳири Бадахшӣ ба хотири интиқод, ба хотири адолати миллӣ дар зиндони Пули Чархӣ андохта шуд. Баҳриддин Воиз, Ҳафизи Панҷшерӣ, Маҷиди Калаконӣ ва ҳазорҳо тани дигар барои ҳамин масъала кушта шуданд”.

Латифи Пидром қаблан баъди тавофуқи Абдуллоҳ Абдуллоҳ ва Ашраф Ғанӣ барои ташкили ҳукумати ваҳдати миллӣ аз худ ба унвони мухолифи ин ҳукумат дарак дод ва гуфт, тоҷикон дар ин ҳукумат ҳеч ҷойгоҳе надоранд. Ӯ дар ҳамоише ба муқобили ҳукумати ваҳдати миллӣ гуфт, “ҷавонон, мардон, пирмардон ва занони тоҷик камари ҳиммат бастаанд, то ҷойгоҳи худро таъриф кунанд. Хиёнате, ки сурат гирифтааст ифшо кунанд, аз муомилагириҳо парда бардоранд ва роҳро барои насли ҷадид ва муборизи тоҷик боз кунанд ва ифтихору адолатро ба ин қавм баргардонанд”.