05 мар 2015 08:52Тоҷикистон / Иҷтимоӣ

Қазоқистон: Кор бо Барзу Абдураззоқов орзуи ҳар ҳунарманд аст (ВИДЕО)

Расонаҳои Қазоқистон ба намоиши ахири Барзу Абдураззоқов, коргардони тоҷик, бо номи “Ревизор” (аз рӯи асари Николай Василевич Гогол), ки дар театри мусиқии ба номи Собит Муканов ба саҳна гузошта шуд, баҳои баланд додаанд.

Барзу Абдураззоқов бо ҳайати театри мазкур тайи ду моҳ кор карда ва намоиши сесоатиеро таҳия кардаанд. Кормандони театр кор бо коргардоне монанди Барзуро орзӯи ҳар ҳунарманд гуфтаанд: “Барзу Абдураззоқов барои гуруҳ на танҳо коргардон, балки мураббӣ ва равоншинос буд”.

Биржан Жалгасбоев, раҳбари театр ба МТРК гуфтааст, “намоишҳои Барзу Абдураззоқов миёни тамоми тамошобинон маъруфият касб мекунад. Барои мо ҳамкорӣ бо ӯ хеле муҳим буд. Шояд дар оянда низ рӯи намоишномае кор мекунем”.

Театри мусиқии ба номи Собит Муканов аввалин театри Қазоқистон нест, ки Барзу Абдураззоқовро барои ҳамкорӣ даъват кардааст. Дар моҳи ноябри соли 2014, вақте намоишномаи ӯ бо номи “Роҳи тӯлонӣ то Макка” дар ҷашнвораи ҷашнвораи байналмилалӣ дар Тарази Қазоқистон соҳиби Гран-прӣ шуд, театри Павлодар ва театри академии ба номи Авезови Алмаато аз ӯ талаби ҳамкорӣ карда буданд.

Барзу Абдураззоқов охирҳои моҳи январи соли сипаришуда Тоҷикистонро ба қасди Қирғизистон тарк кард ва наздикони ӯ гуфтанд, барои кор ва зиндагӣ ба шаҳри Бишкек рафтааст. Далели тарки Тоҷикистон кардани коргардони маъруфро ба он рабт доданд, ки дар театрҳои кишвар ӯро ба кор нагирифтаанд. Абдураззоқов яке аз коргардонҳои шинохтаи Тоҷикистон аст, ки дар гузашта раҳбарии Театри ба номи Камоли Хуҷандӣ ва Театри ҷавонон ба номи Маҳмуди Воҳид дар Тоҷикистонро ба уҳда дошт.

Охирҳои моҳи феврал дар театри ба номи Абдумомунови шаҳри Бишкек мактаби коргардонии Барзу Абдураззоқов таъсис ёфта, авохири моҳи март Вазорати фарҳанг ва Анҷумани фаъолони театри Қирғизистон барои беҳтарин ҳунари коргардонӣ дар 5 соли охир ба Барзу Абдураззоқов ҷоиза дод.

Барзу Абдураззоқов 19 сентябри соли 1959 дар оилаи ҳунармандони асил - Ҳабибулло Абдураззоқов ва Фотима Ғуломова ба дунё омадааст. Соли 1976 ба Донишкадаи давлатии санъати Тоҷикистон ба номи Мирзо Турсунзода дохил шуда, соли 1980 онро хатм мекунад. Дар давоми солҳои 1980 то 1987 дар факултаи режиссёрии Донишкадаи давлатии ҳунарҳои театрии Русия маъруф ба ГИТИС таҳсил кардааст. Фаъолияти касбияшро дар Тоҷикистон аз театри давлатии шаҳри Хуҷанд оғоз карда, минбаъд дар театри ҷавонони ба номи Маҳмудҷон Воҳидов, театри драмавии русӣ ба номи Маяковский, театри драмавии ба номи Абулқосим Лоҳутӣ дар шаҳри Душанбе идома додааст. Беш аз 50 асарро ба саҳна гузошта, соҳиби чандин ҷоиза ва унвонҳо мебошад.

Мӯҳр

Хабарҳои монанд: